Дэлхийн алдарт “Versace” брэндийн загварын ордонд ажиллаж байсан загвар зохион бүтээгч Марко Таглефери “Хайрын хурим” салоны урилгаар Монголд загваруудаасаа сонирхуулах болсон талаар өнөөдөр мэдээлэл хийлээ. Арванхоёрдугаар сарын 5, 6-нд болох загварын шоу хоёр хэсгээс бүрдэх бөгөөд Марко Таглефери өөрийн 15-16 төрлийн загвараа, “Хайрын хурим” салон мөн өөрсдийн коллекциудаа толилуулах юм байна.

Марко Таглефери хэлэхдээ “Дизайн талаасаа Монголын дизайнерууд хэт их монголжуу байна. Тийм болохоор санаагаа илүү нээлттэй байлгаж, олон улсын загварын чиг хандлага, хувилбаруудыг судалж, сонирхох хэрэгтэй юм болов уу гэж санагдсан. Загварын чиг хандлагыг сайн мэдэрч, түүнийгээ уламжлалт онцлогтойгоо хослуулан шингээх нь зөв байх” хэмээн Монголын загварын ертөнцийн тухай товчхон сэтгэгдэл хэлсэн юм.