Шастины нэрэмжит Улсын гуравдугаар эмнэлгийн Стратеги төлөвлөлт эрхэлсэн орлогч дарга Л.Баярцэцэг, их эмч А.Баярзаяа, лаборант Д.Оюунсүрэн, Ба.Сувд нарт Баянзүрх дүүргийн цагдаагийн хэлтсээс эрүүгийн хэрэг үүсгэн, шалгаж эхэлжээ. Эмнэлгийн Стратеги төлөвлөлт эрхэлсэн орлогч дарга Л.Баярцэцэг нь хүнд гэмт хэрэгт сэжигтнээр шалгагдаж байсан өөрийн төрсөн ах Л.Батмөнхөд элэгний хүнд өвчтэй гэх оношийг хуурамчаар үйлдэн, өвчтөний түүхийг өөрчилсөн хэрэгт буруутгагдаж байгаа юм.

III эмнэлгийн Стратеги төлөвлөлт эрхэлсэн орлогч дарга Л.Баярцэцэг “Эмч А.Баярзаяа нарт үүрэг өгч, эмнэлгийн төв мэдээллийн системд нэвтрэн, өвчтөний оношийг өөрчилсөн” гэдгээ эхний мэдүүлэгтээ хүлээн зөвшөөрчээ.

 Л.Баярцэцэг тэргүүтэй эмч нарыг Эрүүгийн хуулийн 245 буюу хэрэг бүртгэлт, мөрдөн байцаалтын явцад албан тушаалаа ашиглаж саад хийхийг оролдсон хэрэгт буруутгаж байгаа юм. Хэргийг прокурорын байгууллага хянаж үзээд, шүүхээс эмч нарыг буруутай гэж үзвэл 3-5 жилийн хорих ял оноох бололтой.