Монгол Улсын Ерөнхийлөгчийн Тамгын газраас Ерөнхийлөгчийн санаачлан боловсруулсан Иргэний оролцоог дэмжих үндэсний хөтөлбөрийг танилцуулах “Өглөөний цай” арга хэмжээг өчигдөр зохион байгуулсан юм. Энэ үеэр чихэнд чимэгтэй нэг мэдээ дуулдсан нь Монгол Улс авлига огцом буурсан орноор шалгарсан тухай байв. Монгол Улсын эдийн засаг 2011 онд дэлхийд хамгийн хурдацтай өсөлттэй байсан. Харин 2012 онд Монгол Улс олон улсын “Transparency International” байгууллагын дүгнэлтээр дэлхийд авлигын хэмжээ нь хамгийн хурдтай буурсан орноор шалгарчээ.

Монгол Улс  2011 онд уг жагсаалтын 120-д жагсч байсан бол өнөөдөр 26 байраар урагшилж, 94 дүгээрт бичигдсэн байна. Энэ бол дэлхийн аль ч улсад гараагүй амжилт болохыг Монгол Улсын Ерөнхийлөгч хэлж байлаа. “Энэ бол иргэдийн оролцоо, хуулийн хэрэгжилт  ямар чухал вэ гэдгийг харуулж байна. Эрх мэдэлтнүүд өөрсдөө асуудал шийддэг бус тодорхой механизмаар шийддэг байх нь чухал. Монгол Улс 26 байраар урагшилсныг “Transparency International” –ийн сайтаас интернэтээр ороод үзэх боломжтой” гэж Ерөнхийлөгч хэлж байлаа.