Ардын намын Удирдах зөвлөл өчигдөр хуралдсан. Хуралдааны дараа хэвлэлийн бага хурал зарлаж сэтгүүлчдэд мэдээлэл хийлээ. Хэвлэлийн бага хуралд Ардын намын дарга, Ерөнхий сайд С.Батболд, тус намын Ерөнхий нарийн бичгийн дарга У.Хүрэлсүх, УИХ дахь Ардын намын бүлгийн дарга Ө.Энхтүвшин, Шадар сайд М.Энхболд нар оролцсон юм. Удирдах зөвлөлийн хурлын үеэр дэд сайд нарыг томилох асуудлыг хэлэлцсэн. Мөн өнгөрсөн хугацаанд орон даяар явуулсан “Ард түмнээ сонсъё” аяны үр дүнгийн талаар ярилцжээ. Ардын намын дарга С.Батболд “ Уг аяныг 2010 оны нэгдүгээр сараас өнгөрсөн оны арваннэгдүгээр сар хүртэл орон даяар явуулсан. Аяны хүрээнд 21 аймаг, нийслэлийн есөн дүүрэг, 283 сум, 152 хороонд хүрч ажиллан нэг сая орчим хүний саналыг сонсжээ. Ингэхдээ 106 орчим мянган км зам туулж, нарийвчилсан тоогоор 978 мянга 805 хүнтэй уулзсан байна. Мөн давхардсан тоогоор 74 мянга гаруй санал, хүсэлт хүлээн авчээ. Үүнээс 15 мянга гаруй санал, хүсэлтийг газар дээр нь шийдвэрлэсэн” хэмээн мэдээллээ. Тодруулбал, “Иргэдийн санал, хүсэлтийн 70 орчим хувийг шийдэхээр Монгол Улсын 2012 оны төсөв болон орон нутгийн төсөвт тусгасан” гэж байна. Аяны үеэр иргэдийн зүгээс нийгэмд сахилга хариуцлагыг сайжруулах, архидалттай тэмцэх, төрийн албан хаагчдын сахилга батыг дээшлүүлэх, ажилгүйдэл, ядуурлыг бууруулах талаар хийж байгаа ажлаа эрчимжүүлэх талаар сануулж байсан аж. Тиймээс Ардын намынхан Бага хурал, Удирдах зөвлөлийн хурлаараа энэ асуудлыг хэлэлцэх бололтой. 

Харин одоо Ардын намынхан аяны хүрээнд цуглуулсан мэдээлэл, иргэдийн санал дээр үндэслэн “Ард түмний хөгжлийн хөтөлбөр”-ийг батлах гэнэ. Ардын намын Бага хурал маргааш хуралдана. Энэ үеэр хэлэлцэх гол асуудал нь ч хөгжлийн хөтөлбөр байх ажээ. “Хуралдааны үеэр хөгжлийн хөтөлбөрт тусгах саналуудыг нээлттэй хэлэлцэнэ” гэж тус намын удирдлагууд мэдээлж байна. Ардын намын үйл ажиллагаа цаашдаа “Ард түмний хөгжлийн хөтөлбөр”-төө захирагдаж байх ажээ. Нэг ёсондоо тус намынхан УИХ-ын 2012 оны сонгуульд оролцох мөрийн хөтөлбөртөө хөгжлийн хөтөлбөрт багтсан асуудлуудыг тусгана гэж ойлгож болох нь.