-Ухаалаг утсаар нүүдэл заалгасан Гүржийн шатарчны тэмцээнд оролцох эрхийг 3 жилээр хасав–

Гүржийн хошой аварга шатарчин Гайоз Нигализе-г Дубайн тэмцээнээс хөөжээ. Хөөх болсон шалтгаан нь шатарчин залуу байсхийгээд л 00-ийн өрөө рүү гүйхдээ ухаалаг утсаараа нүүдэл заалгаад байсныг нь илрүүлсэн юм байна. Түүнтэй тоглож байсан Армений шатарчин гүрж залууг ойр ойрхон  00 гүйгээд буйг анзаарч, сэжиглэсэн аж. Ингээд тэмцээнийг зохион байгуулагчдад гомдол гаргасан ажээ. Гомдлын дагуу Гүржийн шатарчны биед ямар нэгэн төхөөрөмж байгаа эсэхийг шалгахад юу ч илрээгүй ч 00-ийн өрөөг шалгахад тэдний шатрын өргийн анализтай гар утас олдсон гэнэ.

Нигализе утсыг өөрийнх нь биш гэж мэдэгдсэн ч спортын шударга өрсөлдөөний журмыг зөрчсөн тул тэмцээнээс хассан байна. Мөн тэмцээнд оролцох эрхийг нь 3 жилээр хасчээ. Хэрвээ Нигализе гурван жилийн дараагаар дахин ийм үйлдэл гаргавал 15 жилээр тэмцээнд оролцох эрхийг нь хасах юм байна.

Р.ГЭГЭЭ

Эх сурвалж: http://horom.mn