Ерөнхийлөгч асан Н.Энхбаяр инээмсэглэж байна. Түүний инээмсэглэлд элэглэл, доромжлол, басамжлал, ялан дийлэх ухаан бүхэлдээ багтаж буй. Эрх чөлөөгүйдэхийн зов­лонг амсч үзээгүйдээ тэр лав­тайяа баярлаж суугаа. Шүүхийн шийдвэртэй зэрэг­цээд эрх чөлөөгүйдэх гашуун үнэнтэй нүүр тулдаг  хоригдлын үйл лайг тэр эдэлсэн нь үгүй. Өдрөөс өдөрт Монголд түүн шиг хүчирхэг хүн үгүй болж байна. Мянга түм эсэргүүцэж, ард олон эсрэгцэн шүүмжлээд ч түүнд бууж өгч чадахгүй л байна. Учир нь тэр яг л соронзон мэт байх бөгөөд үхэж буй хоригдлын дүрийг гайхамшигтай мундгаар бүтээж байгаа нь энэ. Юун, яа­сан Ардын жүжигчин. Гавь­яат…Түүнээс илүү дүр бүтээгч. Хэрэв би СУИС-ийн багш байсан бол “Та нар тэр Н.Энхбаярын нүдийг харсан уу. 11 хоногийн хуурай өлсгөлөнгийн дараах нүд гэхэд ямар гал цогтой, эрэмгий байна вэ.

Та нар яг л тэгж жүжиглэх хэрэгтэй. Н.Энхбаяраас суралц. Дахин суралц” гэж зөвлөх байлаа. Өнгөрсөн долоо хоногийн баасан гарагт болсон шүүх хурлын өмнө ч тэр жүжиглэж чадсан. Гэхдээ тэр өнгөрсөн хугацаанд Монголын улс­төрчдийн бүрдүүлж чадаагүй тийм хүчтэй багийг бүрдүүлж чадснаа дахин зарлав. Шадар сайд, Сангийн сайд, Эрүүл мэндийн сайд, УИХ-ын гишүүд. Өөртэй нь хамааралтай байсан хүн бүрт “Н.Энхбаяр гэдэг хүний энэ насны боол шүү” гэдгийг ойлгуулж, тунхаглаж, араасаа мөлхүүлж чадна гэдэг бол гайхамшиг. Түүний энэ хүчний өмнө Монголын шүүх бууж өгч байна. Бүр Дээд шүүх шүү. Сүхбаатар дүүргийн шүүх дээр анхан шатны шүүх хурал болоход монголчууд бүгдээрээ нүд салгалгүй ширтэж, сонсч байсан. Тэр их хяналт, тэр их дарамтан дор анхан шатны шүүхийн шүүгчид Н.Энхбаярт дөрвөн жилийн ял оноож чадсан. Эзэн холбогдогчдод нь ч мөн адил. Гэтэл үүнийг нь Дээд шүүх хэрэгсэхгүй болгочихлоо. “ТV-9” телевиз болон “Эрдэнэт” үйлдвэрт шахсан ган бөмбөлгийнх нь хэргийг ор тас хэрэгсэхгүй болгочихов. Ингэснээр дөрвөн жилийн ялаас нь 2,6 жилийн ял нь  Н.Энхбаяр гэдэг хүний нуруун дээр үлдэв. Гол нь энэ бүхэнд Н.Энхбаяр хийгээд Н.Энхбаярын багийнхан баярлахгүй байгаа. Харин ч Монголын шүүхийг элэглэн шоолж, “Н.Энхбаяр бол гэм зэмгүй хүн юм” гэсэн мессежийг нийгэмд тарааж эхэллээ.

Хууль зүйн дэд сайд Э.Эр­дэнэжамъян нь намаасаа сон­гогдсон УИХ-ын гишүүдтэй тохой залган суугаад “Улс төрийн хэл­мэгдүүлэлт зогсоогүй байна. Яаж ийгээд ял өгөх гэсэн байр суурь нь хадаглагдаж үлдлээ. Би яагаад ч энэ хэлмэгдүүлэлтийг хүлээн зөв­шөөрөхгүй. Дараагийнх нь ямар гарц байна тэр болгоноор тэмцэж ажиллана” гэж байна. Хууль зүйн дэд сайд шүү. Эвсэж, эвлэлдэж засаг барьсны гай нь энэ. Эвсэх нэрээр Н.Энхбаярыг суллах ганцхан зорилгоо биелүүлэхийг хүссэн МАХН-ынхан Хууль зүйн дэд сайдаар нь Монголын шүүхийг элэглүүлж, доромжлуулаад сууж байна гэдэг бол харамсал. УИХ-ын гишүүн нь ч дутахгүй. З.Баянсэлэнгэ гишүүн гэхэд “Н.Энхбаяр даргад тулгаад байсан хэргүүдийн тал хувь нь хэрэгсэхгүй боллоо. Тэгэхээр энэ бүхэн хэлмэгдүүлэлт байсныг нотолж байна. Өнөөдөр Монгол Улсад хүн бүр хууль шүүхийн өмнө эрх тэгш гэчихээд улс төрийн агуулгаар хүнийг яллаж болохгүй. Улсад нэг ч төгрөгийн хохирол учраагүй хэргээр шийтгэлээ” гэлээ. УИХ-ын гишүүн О.Баасанхүү гэхэд мөн л адилхан. “Н.Энхбаяр даргыг цагаатгах боломжтой. Тэр 1937 он хэлмэгдүүлэлт бүгдээрээ хуулийн байгууллагаар яваад ялаа авчихсан байсан. Дараа нь түүх тэднийг уучлаад, шүүхээс цагаатгасан. Бид эхний ээлжинд шүүгчдийн Бүгд хурлаар оруулах гээд хандана. Мөн цагаатгалын комисст хандана. Цагаатгах бололцоо нь бол энэ улс төрийн хэрэг. Хүний эрхийнхэн энэ бол улстөрийн хоригдол мөн гэдгийг тогтоосон. Монгол Улсын Ерөнхийлөгч уучлалт үзүүлэх ч гарц бий. Н.Энхбаяр Ерөнхийлөгч бол намайг уучлаач гэж царайчилж явахгүй байх. Харин миний хувьд улс төрийн хоригдол мөн учраас цагаатгалын комисс шийднэ. Ца­гаатгах гарц бий” ч гэх шиг.

Тэд үүгээрээ “Бид одоо ард олны тархийг угаах сайхан мессежтэй боллоо” хэмээн баярлаж байна. “Шүүх хоёр хэргийг нь хэрэгсэхгүй болгож байгаа юм чинь гуравдах, дөрөвдэх нь ч гэсэн худлаа байгаа биз” гэж хэлэх боломж олдсон учраас тэр. Тэд үүний төлөө ердөө тавхан хоногийн өмнө “Шинэчлэлийн Засгийн газраас гарна” гэж айлгасан. Засгаас гарах, гарахдаа МҮАН-ыг ч тэр давхар авч гарна гэдгээ зарлаж байсан. Үүнийх нь дараа Н.Энхбаяр нь “Засаг тогтвортой ажиллах ёстой. Гэхдээ намайг хэлмэгдүүлэхгүй сулласан тохиолдолд шүү дээ” гэсэн утга бүхий сонин мэдэгдлийг ард олныг унтаж байх хооронд буюу шөнө дунд гаргаж байгаа юм.

Тэд дараагийн удаад үлдсэн 2.6 жилийн хорих ялыг устгуулан төлөө ажиллана. Санасандаа хүрсэн тохиолдолд Монголын шүүхийг, Монголын төрийг, Монголын ард түмнийг бүхэлд нь элэглэн шоолж, эргүүтүүлэн басамжилна. Энэ бол Н.Энхбаярын улс төрийн тоглолт. Тэр бусдаас илүү хор бодож олдог учраас төдийгөөс өдий хүртэл Монголын улс төрд амь бөхтэй оршсоор байгаа нь энэ биз ээ.