Нигерийн Кадуна мужийн Малали хотын “Catholic” сүмийн мөргөлийн үеэр тэсрэх бөмбөг бүхий автомашинтай амиа золиослогч этгээд сүм рүү дайрч орон бөмбөг тэсэлсэн байна. Үүний улмаас долоон хүн нас барж, олон тооны хүн гэмтэж бэртжээ. Энэхүү дэлбэрэлтийн дараа сүмийг хотын цагдаагийн болон цэргийнхэн хамгаалалтдаа авч, гэмтэж бэртсэн хүмүүсийг түргэн тусламжийн тэргүүдээр ойролцоох эмнэлэг рүү яаралтай хүргэсэн байна.  Одоогоор тус халдлагын хариуцлагыг ямар нэгэн зэвсэгт бүлэглэл хүлээнэ гэж мэдэгдээгүй байгаа аж. Гэхдээ Нигерт Христийн сүмүүдэд ихэвчлэн Исламын радикал “Боко Харам” зэвсэгт бүлэглэлийн дайчид халдлага үйлддэг байна.

Энэ хэрэгтэй хобоотойгоор Ерөнхийлөгч Гудлак Жонатан мэдэгдэл хийжээ. Ерөнхийлөгч Гудлак Жонатан дээрх халдлагыг ард иргэдийн амар тайван байдлыг алдагдуулсан зохисгүй үйлдэл хэмээн буруутгаж, лалын зэвсэгт бүлэглэлүүдийн эсрэг авч хэрэгжүүлж буй ажиллагаагаа эрчимжүүлж, халдлага дайралтыг зогсоохын тулд шийдвэртэй хариу арга хэмжээ авна гэж амласан байна. Кадуна муж нь Нигерийн лалын шашинтнууд голдуу суурьшдаг умард хэсэг болон Христийн шашинтнууд давамгайлсан өмнөд хэсгийн дунд оршдог ажээ. Мөн тус мужид энэ он гарсаар амиа золиослогчдын халдлага дайралтын улмаас нийт 50 гаруй хүн амь үрэгдээд байгаа юм.