Иран улс өнөөдөр өглөө сансарт хиймэл дагуул хөөргөсөн тухай ИТАР-ТАСС мэдээлэв. Иран өөрийн үйлдвэрлэсэн "Навид-е эльм о санат" хиймэл дагуулыг тойрог замд амжилттай хөөргөсөн бөгөөд энэ нь Ираны хөөргөсөн гурав дахь хиймэл дагуул юм. Эхний хиймэл дагуул "Омид"-ыг 2009 оны хоёрдугаар сард, дараа нь 2011 оны зургадугаар сард "Расад"-ыг  тус тус хөөргөж байжээ.

Ираны Сансрын агентлагийн дарга Хамид Фазелийн хэлснээр ойрын хугацаанд тэд сармагчинг сансарт илгээхээр төлөвлөж буй гэнэ. Өнгөрсөн оны аравдугаар сард туршилтын энэ хиймэл дагуулыг хөөргөхөөр төлөвлөж байсан ч хойшлуулсан юм. Мөн хоёр хиймэл дагуулыг дараа нь хөөргөхөөр төлөвлөөд байгаагаа Хамид Фазель мэдэгдлээ.

Ираны Ерөнхийлөгч Махмуд Ахмадинежад тус агентлагийг ойрын арван жилд сансрын нисэгч хөөргөхийг хоёр жилийн өмнө даалгасан юм.