Нийслэлийн хэмжээнд өчигдөр иргэд, аж ахуйн нэгж байгууллагуудаас обьектын гал түймрийн 11 удаагийн дуудлагыг Мэдээлэл, шуурхай удирдлагын төвд ирүүлж, дуудлагын дагуу НОБГ-ын Аврах гал унтраах 10, 14, 26, 29, 34, 63 дугаар ангиуд, Аврах салбар, Шуурхай бүлэг 105-ын алба хаагчид ажилласан байна. Нийт дуудлагын долоо нь зөвхөн байшин, барилга шатсан дуудлага байв. Тухайлбал, Сүхбаатар дүүргийн наймдугаар хорооны нутаг дэвсгэрт байрлах  МАН-ын шинээр баригдаж буй “Тусгаар тогтнолын ордон”-ы байр шатаж байна гэсэн дуудлагыг 11:39 цагт иргэд утсаар мэдээлсний дагуу  Аврах, гал унтраах 10 дугаар  ангийн 1, 2 дугаар тасаг автомеханик шат, гэрэл холбооны автомашинтайгаар гарсан байна. Аврагчдыг тухайн газар очиход МАН-ын барилгын агааржуулалтын суваг шатаж байжээ. 12 давхар уг барилгын наймдугаар давхраас гал гарч эхэлсэн, барилгын давхруудад  утаажилт ихтэй  байснаас гал сөнөөгчид хорт хий утаанаас хамгаалах багтай ажилласан байна.  Нэмэлтээр Аврах, гал унтраах 14, 34, 63 дугаар анги, Аврах салбар, Шуурхай бүлэг-105-ын  нийт 58 алба хаагч  ажиллажээ. Галыг 50 минутын хугацаанд бүрэн унтрааж, нийт хоёр тонн ус,  32.75 литр шатахуун зарцуулсан байна. Гал түймэр гарсан шалтгаан нөхцөлийг тогтоохоор Улсын мөрдөн байцаах газар,  хууль хяналтын байгууллага ажиллаж байна гэж Нийслэлийн Онцгой байдлын газраас мэдээллээ. МАН-ын шинэ барилгад гарсан гал түймрийн нөхцөл байдалтай танилцахаар  Монгол Улсын Ерөнхий сайд С.Батболд, ОБЕГ-ын дарга тэргүүн коммисар Ц.Амгаланбаяр, НОБГ-ын дарга коммисар Х.Батбилэг нар болон холбогдох хүмүүс тухайн газар ажиллажээ.

Ер нь нийслэлийн хэмжээнд гарч буй обьектын гал түймрийн 90 гаруй хувь нь иргэд, аж ахуйн нэгж байгууллагуудын болгоомжгүй, санамсаргүй  үйлдлээс, үлдсэн хувь нь бусад шалтгаанаас болж гардаг байна.  Өнөөдрийн байдлаар он гарснаас хойш Улаанбаатар хотын хэмжээнд обьектын гал түймрийн нийт 1899 удаагийн дуудлага НОБГ-т иржээ.