Сүүлийн үед цалингийн тал дээр Барсатай тохиролцож чадахгүй байсан Иньеста 2015 он хүртэл шинэ гэрээ байгуулаад удаагүй байгаа билээ. Иньестагийн хэвлэлийн бага хуралын үеэр Барсагийн дасгалжуулагч Мартино түүний талаар ийн ярьжээ. “Иньеста бол Барсагийн бэлэг тэмдэг. Тэр бол Испанийн бахархал болсон хөлбөмбөгч. Үүнтэй хэн ч маргахгүй. Бүх багууд түүнийг эгнээндээ элсүүлэхийг хүсдэг. Гэхдээ Барсаг түүнгүйгээр төсөөлөшгүй. Тиймдээ ч тэр үлдсэн юм” гэж Мартино ярьсан байна. Барса Ла лигийг гайхалтай эхлүүлж байгаа бөгөөд ням гаригт хэрвээ ялвал багийнхаа түүхэн дэх хамгийн гайхалтай эхлэлийг тавих юм. Барса нэг тоглолтод дунджаар 3,6 гоол оруулдаг гэсэн бахдам статистикийг үзүүлээд байгаа билээ. Ньювэлс Олд Бойс клубыг дасгалжуулж байсан түүнийг Барсагийн хэмнэлийг алдагдуулж байгаа гэж шүүмжлэх хүн цөөнгүй ч одоогоор нэг ч хожигдоогүй байгаа юм.