Холливудын нэрт жүжигчин Кети Холмс өнгөрөгч оны зургадугаар сард Сури охиных нь аав, экс нөхөр Том Крузээс харилцаагаа тасалсны дараа ганц бие завгүй ээжийн амьдралыг сонгоод нилээдгүй хугацааг үдээд байгаа. “Болзоход арай эрт байна” хэмээн ярьдаг ч нөхрөөсөө салснаас хойш эрчүүдтэй нэр холбогдох нь хэвлэлээр нэг бус удаа цацагдсан Кетигийн ээлжит сенсаци энэ удаа дахин дэгдсэн бололтой.

Учир нь түүнийг саяхан зарим эх сурвалжаар “Mania Days” кинонд хамтран тоглож буй Канадын театр киноны нэрт жүжигчин Люк Кирбитэй нууцаар уулзаж байгаа тухай мэдээлэл Америкийн “OK!” сэтгүүлээс эхлээд хэд хэдэн сэтгүүлд нийтлэгджээ. Эдгээр эх сурвалжуудад мэдээлснээр сүүлийн үед Люк, Кети нар ихэнх цагийг хамтдаа өнгөрөөх болсон гэнэ.

Гэсэн хэдий ч өөрийг нь тойрсон элдэв цуурхалд жүжигчин бүсгүй одоог хүртэл ямар ч тайлбар хийгээгүй байгаа аж. Үүнээс өмнө нь Кети жүжигчин Жэйк Жилленхол, жааз хөгжимчин Петер Кинкоттит нартай мөн нэр холбогдоод амжсан юм.