Итгэмээргүй юм, “Central Stage” кинонд тоглодог дэлхийн супер од Монголд ирчихсэн, урд минь бүжиглэж байна. Яг л үлгэр шиг. Тэр тайзыг эзэгнээд л. Яг л тэнгэрт нисэх шувуу шиг дүүлэн ниснэ. Саша Радецки “Кино урлагаас илүүтэй бүжигт дурласан. Би тайзан дээр гараад Саша биш болж, бүжгийнхээ дүрд хувирдаг” хэмээн ярьсан байдаг. Харин тэр энэ удаа Албертад хувирчээ. Залуу гүнтэн Альберт зүсээ хувилган тариачин охин Жизелийн дурлалт залуу болсон байх юм.

Альбертын дүр маш их жүжиглэлт, техник, ур чадвар шаардсан дүр. Тиймээс ч Саша Радецки энэ дүрдээ маш их хайртай гэдэг. Ихэвчлэн муу залуугийн дүрд тоглохыг хүсдэг хэмээн ярих энэ эрхэм анх удаа Монголд ирсэн нь энэ юм. Тэрбээр хамтран бүжиглэж буй Г.Цолмонг “гайхамшигтай” хэмээн үнэлжээ.

“Жизель” балетыг үзэх бүртээ ихэвчлэн Жизелийг ажиглаж, түүнийг өрөвддөг байсан бол энэ удаагийн Жизель өөр мэдрэмж өгөв. Альберт хэдий муу залуу байсан ч эцэстээ алдаандаа маш их харамсч, ганцаардлыг мэдэрдэг. Зарим үзэгчид Альбертыг өрөвдөж, “Саша браво” хэмээн тоглолтын дундуур уухайлан дэмжиж байв. Мэдээж энэ үдшийн Жизелийг магтахгүй өнгөрч болохгүй. Саяхан Гавьяат жүжигчин цолоор шагнуулсан Г.Цолмон театрынхаа тайзнаа дахин тод гялалзаж чадлаа. Тэр монголчуудын хайртай Жизель бол Саша Радецкиг дэлхийн урлагт Альберт хэмээн нэрлэдэг. Ийнхүү дэлхийн Альберт, Монголын Жизельтэй нэгэн тайзнаа бүжиж, А.Аданы хүн төрөлхтөнд бэлэглэсэн сонгодог бүтээлийг танилцуулсан нь үзэгчдэд чин сэтгэгдэл үлдээж чадлаа.

Монголын түүх, соёл урлагийг сонирхон ирсэн Сашад Монгол орон таалагдсан гэдэгт итгэлтэй байна. Түүнд зориулсан үзэгчдийн хүндэтгэл сэтгэл хөөргөм байлаа. Үлгэр амилж, дэлхийн од Монголын тайзнаа ээлж дараалан бүжиглэж буйд их театр баярлаж байна. Үзэгчид ч бас театрын дараагийн зочныг чимээ тавин хүлээж эхэлсэн байв.