Шатахуун импортлогчдод ногдуулсан 17 тэрбумын торгуулийг Шударга өрсөлдөөн, хэрэглэгчийн төлөө газар /ШӨХТГ/-ын дарга Б.Лхагваа өнгөрсөн дөрөвдүгээр сарын 10-нд цуцалсан юм. МҮЭХ үүнийг эсэргүүцэн, Хэрэглэгчдийн нэгдсэн холбооноос ШӨХТГ-ын дарга Б.Лхагвыг албан үүргээс нь чөлөөлүүлэх хүсэлт гаргаж, дөрөвдүгээр сарын 30-нд Монгол Улсын ерөнхий сайд С.Батболдод албан бичиг хүргүүлээд байгаа. Энэ асуудлаар МҮЭХ-ны ерөнхийлөгч Б.Ганбаатар өнөөдөр мэдээлэл хийлээ.

Тэрбээр “Бид хориод хоног энэ хууль бус үйлдэлтэй тэмцэж байна. ШӨХТГ-ын талд ороод, ард түмнийхээ эсрэг ажиллаад байгаа. Хэрэглэгчдийн Үндэсний холбоо гэдэг байгууллага байгаа юм. Хачирхалтай нь тэр байгууллагын тэргүүнээр УИХ-ын гишүүн Ц.Батбаяр ажилладаг. Тэгэхээр тэр хүн энэ хууль бус шийдвэртэй ямар нэгэн байдлаар холбоотой нь тодорхой. Шатахуун импортлогчдод ногдуулсан 17.2 тэрбум төгрөг бол 170 мянган ахмадад сая төгрөг өгөх боломжтой мөнгө. Бид лхагва гаригийн Засгийн газрын хуралдаанаар ямар нэгэн нааштай шийдвэр гаргахгүй бол томоохон тэмцэл эхлүүлэх болно” гэлээ.