Йемений экс ерөнхийлөгч Али Абдалла Салех өнгөрсөн даваа гаригт ерөнхийлөгчийн албан тушаалыг албан ёсоор шинээр сонгогдсон тэргүүн Абдо Раббо Мансур Хадид шилжүүлэн өгчээ. Сана хотын ерөнхийлөгчийн өргөөнд шинэ тэргүүний тангараг өргөх ёслол дээр Салех ийнхүү эрх мэдлээ шилжүүлсэн байна.

Өнгөрсөн сонгуулийн цорын ганц нэр дэвшигч байсан дэд ерөнхийлөгч асан Хади өнгөрсөн бямба гаригт ерөнхийлөгчийн тангарагаа өргөн засаг авах ёслолыг даваа гаригт гүйцэтгэжээ. Энэ ёслолын үеэр хуучин ерөнхийлөгчийг эрүүгийн хариуцлагаас чөлөөлснийг эсэргүүцэн хэдэн мянган йеменчүүд жагсаал хийв. Салех шинэ ерөнхийлөгчид дэмжлэг үзүүлнэ гэж хэлсэн нь жагсагчдын дургүйцлийг улам хүргэжээ. 34 жил засаг барьсан Салехыг огцруулах хөдөлгөөн нэг жил гаруй өрнөж, эсэргүүцлийн үеэр хэдэн зуун хүмүүс алагдаж олон мянган хүн шархадсан юм.