Ерөнхий сайд асан Л.Оюун-Эрдэнэ авлига, албан тушаалын асуудалд шалгагдан суудлаасаа огцорсон. Л.Оюун-Эрдэнийн засагласан хугацаанд парламентад суудалдтай гурван нам буюу МАН, АН, ХҮН хамтарсан Засгийн газар байгуулсан. Гэсэн ч Л.Оюун-Эрдэнийн хүүгээс эхлэлтэй хэргээс болж АН-ыг МАН-ын Бага хурлын гишүүд засгаас гаргах шийдвэр гаргаж, улмаар хамтарсан Засгийн газар огцрох нөхцөл бүрдсэн юм. Ийнхүү бүтэн сарын турш тэг зогссон Монголын гүйцэтгэх засаглал алхам урагшилж, дараагийн Ерөнхий сайдад нэр дэвшсэн Ерөнхийлөгчийн Тамгын газрын дарга Г.Занданшатарыг МАН-ын бага хурлын гишүүдийн олонх нь дэмжсэн юм.

Хуулиараа Ерөнхий сайдад нэр дэвшигчийн нэрийг УИХ-д өргөн мэдүүлнэ. Улмаар Төрийн байгуулалтын байнгын хороогоор хэлэлцэн, УИХ-ын чуулганы нэгдсэн хуралдаанд оруулж, баталснаар Ерөнхий сайд бүрэн эрхээ хэрэгжүүлж эхэлнэ. Улмаар Ерөнхий сайд нь танхимаа байгуулах ба ирэх долдугаар сарын 3-н гэхэд Засгийн газар байгуулагдсан байх ёстой.

Тиймээс Засгийн газрыг МАН дангаараа байгуулах уу, УИХ-д суудалтай намуудтай эвсэж байгуулах уу гэдэг нь олон нийтийн анхаарлын төвд байна.

Ямартай ч огцорсон Засгийн газрын зарим сайд нар дахин засагт хамтрахгүй гэдгээ илэрхийлсэн бол, УИХ дахь МАН-ын бүлгийн гишүүдээс УИХ-ын гишүүн, Гадаад харилцааны сайд Б.Батцэцэг, УИХ-ын гишүүн Э.Бат-Амгалан нар шинэ Ерөнхий сайд тодорсны дараа танхимдаа ажиллах санал тавибал татгалзах зүйлгүй хүлээн авч ажиллах болно гэдгээ хэлээд амжсан.

Л.ОЮУН-ЭРДЭНЭТЭЙ ХАМТ ОГЦОРСОН 22 САЙД

 МАН:

• Монгол Улсын Шадар сайд С.Амарсайхан
• Зам тээврийн сайдаар Б.Дэлгэрсайхан
• Аялал жуулчлал, соёл, спорт залуучуудын сайдаар Ч.Номин
• Гадаад харилцааны сайдаар Б.Батцэцэг
• Сангийн сайдаар Б.Жавхлан
• Эрчим хүчний сайдаар Б.Чойжилсүрэн
• Батлан хамгаалахын сайд С.Бямбацогт
• Гэр бүл, нийгмийн хамгааллын сайдаар  Л.Энх-Амгалан
• Засгийн газрын Хэрэг эрхлэх газрын даргаар Н.Учрал 
• Хүнс, хөдөө аж ахуй хөнгөн үйлдвэрийн сайдаар Ж.Энхбаяр
• Монгол Улсын сайд, Боомтын сэргэлтийн Үндэсний хорооны даргаар  Б.Тулга
• Эрүүл мэндийн сайд Т.Мөнхсайхан

АН:

Монгол Улсын Тэргүүн Шадар сайд бөгөөд Эдийн засаг, хөгжлийн сайд Л.Гантөмөр

• Монгол Улсын сайд, Хяналт үнэлгээний үндэсний хорооны дарга Э.Одбаяр
• Монгол Улсын сайд, 20 минутын хот төслийн Үндэсний хорооны даргаар Р.Эрдэнэбүрэн
• Аж үйлдвэр Эрдэс баялгийн сайд Ц.Туваан
• Хот байгуулалт орон сууцжуулалтын сайд Ж.Батсуурь
• Хууль зүй, дотоод хэргийн сайдаар О.Алтангэрэл 
• Байгаль орчин, уур амьсгалын өөрчлөлтийн сайдаар С.Одонтуяа
• Цахим хөгжил, инноваци, харилцаа холбооны сайдаар Ц.Баатархүү

ХҮН:

Шадар сайд Т.Доржханд /Худалдан авах, хөрөнгө оруулалт хариуцсан/

• Боловсролын сайд П.Наранбаяр нар ажиллаж байв.