УИХ дахь МАН-ын гишүүдийн хуралдаан дуусч, УИХ-ын гишүүн Н.Энхболд, Су.Батболд, Я.Содбаатар нар сэтгүүлчдэд мэдээлэл хийлээ. Тус намын гишүүд хэд, хэдэн асуудлыг хэлэлцсэний дотор УИХ-ын анхдугаар чуулганыг хаахтай холбоотой асуудал болон ээлжит бус чуулганаар хэлэлцэх асуудлыг тус бүр ярилцсан байна. Тодруулбал, УИХ-ын анхдугаар чуулганыг хаахын өмнө УИХ бүтцийн байгууллагаа бүрэн байгуулах ёстой. Үүний тулд хамгийн тэргүүнд МАН-ын бүлгийн асуудлыг шийдвэрлэх ёстой, дараа нь ээлжит бус чуулганыг зарлан хуралдуулах нь зөв гэж үзжээ. Мөн Нийслэлийн шүүхээс өчигдөр Өвөрхангай аймаг буюу УИХ-ын 10 дугаар тойрогт нэр дэвшин өрсөлдсөн С.Чинзориг, Ш.Төмөрсүх нарын асуудлыг хэлэлцэж, шийдвэр гаргасан. Энэ асуудалд УИХ байр сууриа илэрхийлэх ёстой хэмээн үзжээ.

Хуульд зааснаар УИХ-ын дэд хорооноос Төсвийн зарлагын дэд хороог цөөнхийн бүлэг удирдах ёстой юм байна. Тиймээс тус дэд хорооны даргад МАН-ын гишүүд УИХ-ын гишүүн Ж.Эрдэнэбатыг нэр дэвшүүлжээ. Төсвийн зарлагын дэд хорооны хувьд хийх хамгийн нэн тэргүүний ажил нь 2012 оны төсөвт тодотгол хийхтэй холбоотой асуудал багтах аж. Дэлгэрэнгүйг удахгүй хүргэх болно.