Сагсан бөмбөгийн Үндэсний Супер лигийн 2013-14 оны улирлын хүрэл медалийн төлөөх тоглолт өнгөрсөн бямба гаригт болж, “Баянгол Гурван тамир” баг хүрэл медалийн болзол хангалаа. Плей-оффын эхний шатанд хожигдол хүлээсэн “Дорнод Танан Гарьд” болон “Баянгол Гурван тамир” багууд медалийн төлөөх цуврал тоглолт биш, цорын ганц шийдвэрлэх тоглолт хийсэн юм.

Тус тоглолтод “Танан Гарьд” багаас О.Ууганбаяр бэртлээс эргэн ирснээ харуулж, талбай дээр 33 минутыг өнгөрүүлсэн. Тэрээр 25 оноо, 9 самбар авсан бол Dane Rawlins 16 оноо, 11 самбар, Freddie Woods 13 оноо, 9 самбар, М.Отгонмөнх 10 оноо, 6 самбар, О.Очирбат 10 оноо, 6 самбар, Ц.Азбаяр 7 оноо, 4 оновчтой дамжуулалт, Г.Ихбаяр 5 оноо авчээ. Харин “Баянгол Гурван тамир” багаас Э.Цэрэнбаатар багаа тэргүүлж, 20 оноо, 10 самбар, мөн Chris Lawson 18 оноо, 12 самбар, 7 оновчтой дамжуулалт, А.Гансүх 16 оноо, 7 самбар, Г.Цэнгүүнбаяр 13 оноо, 3 блок, Austin Witter 11 оноо, 18 самбар, Д.Даваажав 7 оноо, Г.Чинбат, Б.Дархантөгс  нар 5 оноо авчээ.

Улмаар энэ тоглолтод “Баянгол Гурван Тамир” баг 97:89 харьцаатай хожсоноор Үндэсний Супер Лигийн хүрэл медалийг хүртлээ. Тэдний хувьд энэ бүрэлдэхүүнээрээ сагсан бөмбөгийн дээд лигт таван жил тоглож байгаа бөгөөд энэ улиралд анх удаа плей-оффт шалгарч, ийнхүү хүрэл медаль хүртэж байна.

Үндэсний Супер Лигийн аваргын төлөө өрсөлдөж байгаа “Сүхбаатар SBL Хасын Хүлгүүд” болон “УБ Альянс Тех ШУТИС-ийн Харцага” багийн цувралын гурав дахь лхагва гаригт 19.00 цагт Спортын төв ордонд болно.