ЭМЯ: Сөүлээс ирсэн нэг хүнээс коронавирус илэрлээ

Эрүүл мэндийн яамнаас “Covid-19” цар тахлын дэгдэлттэй холбоотой цаг үеийн ээлжит мэдээллээ хийж байна. Өнөөдрийн байдлаар улсын хэмжээнд 1022 иргэн ажиглалтад байна.

Тусгай үүргийн эхний онгоцоор ирсэн 267 иргэнийг ХӨСҮТ, Жаргалант сувилал зэрэг тусгаарлах байруудад тусгаарласан бөгөөд биеийн байдал нь тогтвортой байна.

Эрүүл мэндийн яамны 24 цагийн ажиллагаатай 199 дугаарт 131 хүн холбогдсон байна. ОХУ, Бразил улсаас нийт таван хүн холбогдож коронавируст халдварын талаар зөвлөгөө авчээ.

Сөүл Улаанбаатар чиглэлийн тусгай үүргийн онгоцоор дөрөвдүгээр сарын 30-нд ирсэн 281 хүнд шинжилгээ хийхэд нэг хүнээс коронавирус илэрлээ.

ХӨСҮТ-ийн захирал Д.НЯМХҮҮ:

Франкфурт руу зорчих байсан нэг иргэнээс коронавирус илэрсэн гэдэг нь ташаа мэдээлэл гэдгийг хэлье.

Франкфурт руу зорчих гэж байсан эмэгтэйд эсрэг биет илэрсэн. Өмнө нь хөнгөн өвчилсөн гэсэн үг. Тухайн вирус нь үхжиж, тэмдэг илэрсэн гэсэн үг. Ойрын хавьтлын 15 хүнээс шинжилгээ авч, коронавирус илрээгүй. Тухайн эмэгтэйд Бельги улсаас ирснээс хойш 50 хоног өнгөрсөн, ямар нэгэн шинж тэмдэг илрээгүй.

Сайн мэдээ нь, Францын иргэн эдгэрч, өнөө өглөө нутаг буцлаа. Монголын ард түмэнд талархаж буйгаа илэрхийллээ. Эмчилж эдгээсэн Чинбаяр эмчийн ахлагчтай эмч мэргэжилтнүүдэд талархлаа. Франц улсад байсан бол яахаа мэдэхгүй байна. Монгол Улсад бүрэн эдгэрч нутаг буцаж байгаадаа талархаж байна. Маскаа тайлаад баяртай гээд тэврэлдлээ. Монгол Улсаас аюулгүй эх орондоо нүүр бардам буцаж байна. Миний бие гаргаж өглөө.

ЦАР ТАХЛЫН ҮЕД 280 ОР СУЛЛАНА

Улсын хоёрдугаар төв эмнэлгийн ерөнхий захирал С.Энхболд:

-Өндөржүүлсэн бэлэн байдлыг хангах хүрээнд үйлчлүүлэгчдийн урсгал хөдөлгөөнийг нэг чиглэл болгосон. Жирийн үед гурван орц гарцаар үйлчилдэг байсан бол нэг гарцаар үйлчлүүлэх боломжтой болгосон. Эргэлтийн цагийг богиносгож 17:00 цаг болгосон. Улсын хоёрдугаар төв эмнэлэг 280 ор дэлгэн ажиллах тушаал авсан. Үүнээс эрчимт эмчилгээний тасгийн 50 ор бэлтгэсэн, хөнгөн болон хүнд өвчтөнд 230 ор сулласан. Халдвар тархсан тохиолдолд 12 цагийн дотор 280 ор суллах боломжтой. Одоогоор 100 ор суллаж бэлэн байдалд байна. Тусгаарлах 30 орыг бэлдэж, 24 цагаар эмч сувилагч үйлчлэгч гэсэн багаар ажиллуулж байна. Эмнэлгийн хэмжээнд жирэмсэн ажилчдаа чөлөөлсөн. Тусгаарлах, ажиглалтад буй эмч эмнэлгийн ажилтнуудад сэтгэлзүйн зөвлөгөө өгч байна. Ор бэлтгэх бэлтгэл сургуулилтыг дөрвөн удаа хийсэн. Сургалтад давхардсан тоогоор 600 эмнэлгийн ажилчид хамрагдсан. Хувийн хамгаалах хэрэгсэл өмсөх тайлах сургалтыг тогтмол явуулж байна. Шаардлагагүй бол эмнэлгийн байгууллагаар үйлчлүүлэхгүй байхыг зөвлөж байна.

ҮЙЛЧИЛГЭЭНИЙ БАЙГУУЛЛАГУУД 1.5-2 МЕТРИЙН ЗАЙ БАРИХ ШААРДЛАГАТАЙ

Тандалт, шуурхай удирдлагын хэлтсийн дарга Д.НАРАНГЭРЭЛ:

-Хүний биед хүрэлцэж үйлчилгээ явуулдаг байгууллагууд цахимаар болон утсаар цаг өгөх, хүн хоорондын зайг 1.5-2 метрийн зай барих зэрэг 15 зүйлийн зөвлөгөө өгсөн. Эрүүл мэндийн байгууллагууд эмнэлгийн бэлэн байдлыг хангаж байна. Иргэдээс хүүхдүүд тоглоомын талбайд бөөгнөрч, залуус олноороо цуглаж байна гэх гомдол мэдээлэл их ирж байна.