Испанийн нэрт теннисчин Рафаэль Надаль Катарын Доха хотод болж буй “Qatar ExxonMobil Open” тэмцээний эхний тойргоос хасагдлаа. Тэмцээнд хоёрт эрэмбэлэгдэн тоглосон Надаль дэлхийн чансааны №127-д бичигддэг Германы залуу тоглогч Михаэль Беррерт 1:6, 6:3, 6:4-өөр хожигджээ. Энэ жил аваргаа хамгаалахаар тоглосон дэлхийн чансааг тэргүүлж байсан өдгөө гуравт бичигдэж буй Рафаэль Надаль оны анхны тэмцээнээ эхний тойргоос өндөрлүүллээ. 

"Их дуулга" тэмцээний 14 түрүүт Рафаэль Надалийн хувьд өнгөрсөн онд бэртлийн улмаас "Америкийн нээлттэй тэмцээн"-ийг өнжсөн билээ. Шороон талбайн хаан гэгддэг Надаль "Францын нээлттэй тэмцээн"-д 9 удаа буюу 2005-08, 2010-14 онуудад түрүүлсэн юм. 

1,1 сая ам.долларын шагналын сантай тус тэмцээн энэ сарын 11-д өндөрлөнө.

НЭМЭЛТ:

Рафаэль Надаль тус тэмцээний ганцаарчилсан төрлөөс хасагдсан ч хосын төрөлд Аргентиний Хуан Моникотой хослон тоглож, түрүүллээ. Тэд шигшээ тоглолтод Австрын хосыг 6:3, 6:4-өөр хожжээ.

Ч.БОЛОР