НЭМЭЛТ:

Д.Сэлэнгээ эхний тойрогтоо Украины Анна-Виктория Шевченкотой учраа таарч, 6-2 гэсэн харьцаатай ялжээ. Улмаар дараагийн тойрогтоо Словенийн Зива Лавринчтай учраа таарав. Тэдний харваа 23:34 цагаас болно.

Харин Б.Оюун-Эрдэнэ эхний тойрогтоо Италийн Вероника Флореног ялсан ч дараагийн тойрогтоо Хятадын Вү Чүнянд дийлджээ.

Парисын паралимп үргэлжилж байна. Өнөөдөр/2024.09.03/ байт харвааны төрөл болох бөгөөд Монгол Улсаа төлөөлөн 17:00 цагаас Д.Сэлэнгээ, 17:33 цагаас Б.Оюун-Эрдэнэ нар өрсөлдөнө.

Чансаа тогтоох урьдчилсан харваанд Д.Сэлэнгээ 622 оноо авч, гуравдугаар байрт бичигдсэн бол Б.Оюун-Эрдэнэ 524 оноотой, 18 дугаар байрт бичигджээ.

Чансаа тогтоох харваанд Италийн Элизабетта Мижно 641 оноо авч, нийт 23 тамирчныг тэргүүлсэн аж.

Улмаар өндөр оноо авсан Д.Сэлэнгээ эхний тойрогтоо гоц мөргөсөн бол Б.Оюун-Эрдэнэ эхний тойрогтоо Италийн Вероника Флоренотой учраа таарав.

Б.Оюун-Эрдэнийн хувьд 2012 оны Лондон болон 2016 оны  Риогийн паралимпод оролцож байсан туршлагатай. Харин Д.Сэлэнгээ Токиогийн паралимпод оролцож, дэлхийн аваргаас хүрэл медаль хүртэж байсан аж.