Онцгой байдлын ерөнхий газраас “Гамшгийн эрсдэлийн үнэлгээний мэргэжлийн зөвлөлийн анхдугаар хуралдаан”-ыг өнөөдөр зохион байгуулж байна.

Хуралдааны нээлтийн ажиллагаанд ОБЕГ-ын дарга, хошууч генерал Т.Бадрал оролцож, үг хэллээ.

Тэрээр хэлсэн үгэндээ “Монгол Улсад өнөөдөр салбар бүрийн онцлогт нийцүүлсэн эрсдэлийн үнэлгээний тогтолцоог хэрэгжүүлж, байгаль орчинд нөлөөлөх байдлын нарийвчилсан үнэлгээ, хөдөлмөрийн аюулгүй байдлын үнэлгээ, барилга байгууламжийн тэсвэржилтийн үнэлгээ зэргийг холбогдох мэргэжлийн байгууллагууд эрхлэн хэрэгжүүлж байгаа хэдий ч тухайн аймаг, орон нутаг, хот суурин, эмнэлэг сургууль, дэд бүтцэд тохиолдож болзошгүй гамшгийн эрсдэлийг өргөн цар хүрээнд тооцож, нарийвчилсан үнэлгээ хийх боломж гарахгүй байна. Тиймээс Онцгой байдлын ерөнхий газраас гамшгийн эрсдэлийн үнэлгээний асуудал эрхэлсэн мэргэжилтнүүдийг бэлтгэж, 21 аймаг, 9 дүүрэгт томилон ажиллуулж байна. Мөн “Гамшгийн эрсдэлийн үнэлгээний мэргэшүүлэх сургалт”-ыг Гамшиг судлалын хүрээлэнд зохион байгуулж, 30 гаруй мэргэжилтнийг бэлтгэж, гамшгийн эрсдэлийн нарийвчилсан үнэлгээ хийх мэдлэгийг эзэмшүүллээ. Өнөөдрийн хуралдаанаар Гамшгаас хамгаалах тухай хуулийн 7 дугаар бүлэгт заасан шаардлагыг хангаж гамшгийн эрсдэлийн үнэлгээ хийх тусгай зөвшөөрөл хүссэн нийт 24 аж ахуйн нэгж, байгууллага, хуулийн этгээдэд тусгай зөвшөөрөл олгох эсэх асуудлыг нээлттэй хэлэлцэнэ” гэлээ.

Анхдугаар хуралдаанд ОБЕГ, ЭМЯ, БХБЯ, УУХҮЯ, ЗТХЯ, БОАЯЖЯ, МХЕГ, ДХИС-ийн 20 гаруй төлөөлөл оролцож байна.

Оролцогчид “Гамшгийн эрсдэлийн үнэлгээ хийх тусгай зөвшөөрөл олгох/ хүсэхэд тавигдах шаардлага, анхаарах асуудлууд, “Гамшгийн эрсдэлийн үнэлгээ хийх эрх олгох” сургалтын үр дүнгийн талаар болон хуулийн этгээд, байгууллага, аж ахуйн нэгжийн тусгай зөвшөөрөл хүссэн өргөдлийг хэлэлцэх юм гэж Онцгой байдлын ерөнхий газраас мэдээллээ.