ФИФА-н оны шилдэг дасгалжуулагчид өрсөлдөх 10 дасгалжуулагчийн нэрийг зарлалаа. Эдгээр эрхмүүдийн 5 нь шигшээ багийн дасгалжуулагчид бол үлдсэн 5 нь клубын дасгалжуулагчид ажээ. Оросын шигшээ багийг ДАШТ-нд гайхалтай удирдан хэсгээ тэргүүлж, хасагдах шатанд Испанийг буулган авахад гол ажлыг нугалсан эрхэм С.Черчесов багтсан байна. Түүний удирдсан багийг хэсгээсээ гарах эсэхэд эргэлзэж байсан, ялангуяа Египетийн шигшээ багийг ялна гэдэгт эргэлзэж байсан хүмүүсийг гайхашруулж чадсан эрхэм бол Оросын шигшээгийн жолоог атгаж буй С.Черчесов юм. Дэлхийн аваргын өмнө түүнд эргэлзэж байсан хүмүүс олон бий. Учир нь Оросын шигшээ багийг удирдсан хугацаандаа ихэвчлэн хожигдол амсаад байсан юм.

Мөн түүнээс гадна шигшээ багаа удирдаад жил болоогүй ч ДАШТ-нд гайхалтай амжилт үзүүлж мөнгөн медаль хүртэхэд толгойгоо хамгийн ихээр ажиллуулсан эрхэм З.Далич, 28 жилийн дараа Английн шигшээ багийг ДАШТ-ний хагас шигшээд хүргэсэн, Английн шигшээ багт байрлалын болон тактикийн маш том өөрчлөлтийг зоригтой хийж чадсан Г.Саутейт, Бельгийн шигшээ багийг удирдан ДАШТ-нд оргил амжилтанд нь хүргэсэн Р.Мартинез нарын эрхмүүд багтсан байна. Мэдээж хэрэг ДАШТ-ний алтан цомыг хүртсэн Д.Дешам шилдгийн төлөө өрсөлдөх 10 дасгалжуулагчийн жагсаалтанд нэрлэгдсэн нь зүй ёсных юм. Харин бусад дасгалжуулагчид бол клубынхээ хамтаар өнгөрсөн улиралд Европын болон дотоодын лигтээ өндөр амжилт үзүүлсэн дасгалжуулагчид юм. Шилгүүдийг ирэх 9 сард Английн нийслэл Лондон хотноо тодруулна.

ФИФА-н шилдэгт нэр дэвшигчид:

1. М.Аллегри (Итали. Италийн Ювентус клуб)
2. З.Зидан (Франц. Реал Мадрид клубын дасгалжуулагч асан)
3. Д.Симоне (Аргентин. Испаний Атлетико Мадрид клуб)
4. Э.Валверде (Испани. Испаний Барселона клуб)
5. П.Гуардиола (Испани. Английн Манчестер Сити клуб)
6. Ю.Клопп (Герман. Английн Ливерпүүл клуб)
7. С.Черчесов (Орос. Оросын шигшээ баг)
8. З.Далич (Хорват. Хорватын шигшээ баг)
9. Д.Дешам (Франц. Францын шигшээ баг)
10. Г.Саутейт (Англи. Английн шигшээ баг)
11. Р.Мартинез (Испани. Бельгийн шигшээ баг)

Б.БЯМБАБАЯР