Энэ удаагийн дугаарын зочноор Монгол-Германы Ашигт малтмал технологийн их сургуулийн Сургалт хариуцсан дэд захирал, Химийн профессор Б.Батцэнгэлийг урилаа.
–Танай сургуулийг боловсролын салбарт “жишиг” хэмээх тодотголыг бий болголоо гэж үнэлэх хүн олон байна. Улсын төсвөөр барьсан гэж сонссон?
–Герман улс хамгийн сайн инженерүүдтэй. Тэнд боловсрол эзэмшсэн мэргэжилтнүүд дэлхийд үнэлэгддэг. Харин манай улсын хувьд энэ чиглэлийн боловсон хүчин бэлтгэх нь бага байсан. Тиймээс нийгэмд энэ төрлийн мэргэжилтнүүдийн эрэлт хэрэгцээ их байна. Гэтэл манай ихэнх их, дээд сургууль ихэвчлэн эдийн засаг, хуулийн чиглэл рүү хошуурах юм. 2011 онд манай улсад ХБНГУ-ын канцлер айлчилсан юм. Тухайн үед Ерөнхийлөгч асан Ц.Элбэгдорж гуай дэлхийн төвшинд хүлээн зөвшөөрөх инженер бэлтгэхэд туслалцаа үзүүлээч гэсэн санал тавьсан юм билээ.
–Хоёр жилийн хугацаанд судалгаа хийж байж хөрөнгө оруулсан гэж байсан?
-Хоёр жилийн хугацаанд зах зээлийн судалгаа хийсэн. Манайд ямар салбарын инженер шаардлагатай байна вэ, эрэлт хэрэгцээ нь хаана байна. Мөн энэ сургууль нь ШУТИС, МУИС-ийн харъяа байх уу эсвэл биеэ даасан сургууль байх уу гээд зөвлөлдсөний эцэст хоёр улсын зүгээс инженерийн чиглэлийн загвар сургууль байгуулъя гэсэн шийдэлд хүрсэн байдаг. Ингээд 2013 онд Засгийн газрын тогтоолоор анх үүсгэн байгуулагдсан.
–Судалгаагаар ямар чиглэлийн инженерийн эрэлт хэрэгцээ илүү байна вэ?
-80 гаруй компани дээр хийсэн судалгаагаар механик инженер, уул уурхайн боловсруулах инженер, байгаль орчны инженер хэрэгтэй байна гэсэн дүгнэлтэд хүрч энэ гурван чиглэлээр анх хичээлийн хөтөлбөр боловсруулж эхэлсэн. Үүний дараа үйлдвэрийн эдийн засагч гэсэн хөтөлбөрийг эхлүүлсэн. Энэ чиглэлээр элссэн хүүхдүүд одоо II дамжаанд орчихсон байна.
–Дахин мэргэжил нэмнэ гэж ярьж байсан. Энэ ажил ямар шатандаа явж байна?
-Зах зээлийн хэрэгцээг харж байна. Цахилгааны, энергийн, сэргээгдэх эрчим хүчний инженер хэрэгтэй байна гэсэн. Тиймээс манай сургууль мехатроник, сэргээгдэх эрчим хүчний шинэ анги нээхээр бэлтгэж байна.
–Танай сургуулийг “цогцолбор” гэж тодорхойлмоор санагдсан. Дараагийн ээлжийн оюутны байрны бүтээн байгуулалт хэзээ эхлэх вэ?
-Манай оюутны байр 160 хүний багтаамжтай. Гэтэл сургууль маань 600-700 оюутан хүлээж авах хүчин чадалтай. Хоёр улсын Засгийн газрын зүгээс 2018 онд багтаагаад дотуур байрны өргөтгөлийн барилгын ажлыг эхлүүлнэ гэж төлөвлөсөн. Харин 2019 оноос тусгай лабораториудынхаа барилгыг барина.
–Байршлын хувьд яагаад Налайх дүүргийг сонгосон юм бол?
-Цогцолбор хэлбэрээр барих учир оюутнуудыг аль болох хотоос хол байлгахаар төлөвлөсөн. Учир нь хүүхдүүд их хотын стресс, бөглөрлөөс болж хичээлээсээ хоцрох, таслах үйлдэл ажиглагддаг. Тиймээс сургуулиудыг хотоос гаргах, цогцолбор болгох бодлогыг одоо ч Засгийн газар дэмжиж байгаа. Мөн сургуулийн үйл ажиллагаа, бүтээн байгуулалтыг дагаад Налайх дүүрэг ч хөгжих боломжтой.
-“Тогтвортой хөгжил-Дээд боловсрол” чуулганы үеэр инженерийн чиглэлээр сурах хүүхдийн тоо бага байгааг Ерөнхий сайд У.Хүрэлсүх онцолж байсан?
-Инженерийн чиглэлээр сурах нь олон давуу талтай. Аливаа улсын хөгжлийг инженерүүд тодорхойлдог. Энэ чиглэлийн мэргэжилтнүүд үргэлж шинийг эрэлхийлэгч, бүтээгчид байдаг. Тиймээс мэргэжлээ сонгож буй хүүхдүүд өөрийн хүсэл эрмэлзлэлээс гадна нийгмийн хэрэгцээ, дэлхий хаашаа явж байгааг харж, судалж байж ирээдүйгээ сонгох нь чухал. Цаашлаад 10, 20, 30 жилийн дараа нийгэмд ямар мэргэжилтэн хэрэгтэй вэ гэсэн судалгааг хэзээний гаргачихсан байгаа. Үүнийг эцэг эхчүүд эртнээс анхаарч, хүүхдээ багаас нь бэлтгэдэг байгаасай.
–Танай сургууль эмэгтэй оюутан олонтой харагдсан?
-Жил ирэх тусам инженерийн чиглэлээр суралцах хүсэлтэй охид ихэсч байна. “Рио Тинто” компани гэхэд 2020 он гэхэд ажилтнуудынхаа хүйсийг 50:50 хувьтай болгоно гэж зарласан. Эмэгтэйчүүд ч ялгаагүй энэ салбарт амжилт гаргах боломжтой.
–Танай сургуулийг сонсгосны давуу тал нь юу вэ?
-Инженерийн чиглэлийн чадварлаг мэргэжилтэн болж чадвал нэгдүгээрт, цалин өндөр. Энэ хэрээр таны амьдралын баталгаа нэмэгдэнэ. Манай оюутнууд “Оюутолгой”, “Энержи ресурс” гээд том компанид дадлага хийдэг. Тэнднийхээ араас очиход хүн бүр ам сайтай байдаг. Танай оюутнууд үнэхээр өөр байна. Хүнтэй харьцах харилцаа, гадны мэргэжилтнүүдтэй хэлний бэрхшээлгүй ойлголцож байгаа нь таалагдаж байна. Танайхаас мэргэжилтэн авъя гэсэн хүсэлт тавьдаг нь бидэнд урам өгдөг.
–Төрийн хэвшлийн отгон сургууль нь танайх. Удахгүй анхны төгсөгчдөө хүлээж авах нь?
-Анх 36 оюутантай хичээлээ эхэлсэн. Энэ хүүхдүүд эхлээд нэг жил бэлтгэл ангид сурдаг. Учир нь бүх хичээлийн программ англи хэл дээр явагддаг учир хэлний бэлтгэл хийдэг. Ингээд оюутнууд таван жил сураад энэ жил төгсөх гэж байна.
–Эдгээр оюутны диплом Европын ямар ч оронд хүлээн зөвшөөрөгдөх үү?
-Бид хичээлийн хөтөлбөрөө Европын холбооны урьдчилсан магадлан итгэмжлэлээр оруулсан. Анхны төгсөлтөө хийсний дараа жинхэнэ магадлан итгэмжлэлд орох эрх үүснэ. Үүний дараа манай сургуулийн диплом Европын бүх оронд хүлээн зөвшөөрөгдөнө.
–Бүх хичээлийн хөтөлбөр нь англи хэл дээр явдаг нь танай сургуулийн давуу тал гэж бодож байна?
-Инженерийн чиглэлийн бүх ном, сурах бичиг, гарын авлага англи хэл дээр байдаг. Мөн гадны зочин багш нар хичээлээ англи хэл дээр заадаг учир хэлний мэдлэг зайлшгүй хэрэгтэй. Үүнээс гадна манай төгсөгчид дэлхийн аль ч улсад очсон мэдлэг болон хэлний хувьд гологдохгүй.
Эх сурвалж: “Зууны мэдээ” сонин