Кубын удирдагч асан Фидел Кастрогийн гаргаад байсан цахилгаан, эрчим хүчний талаарх шинэ бодлого буюу “Эрчим хүчний хувьсгал”-ыг Кубын удирдагч Рауль Кастро баталлаа. Уг бодлогын тухайд эрчим хүчний тал дээр хувийн компаниудыг дэмжсэнээр Куба даяарх эрчим хүчний хомсдолыг арилгах юм. Мөн өдрийн цагаар цахилгааны үнийг чөлөөлсөн аж. Эрчим хүчний компаниуд үнээ чөлөөтэй тогтоон нийтэд зарах боломжийг олгож байгаа юм. Энэ тухай төрийн төв хэвлэлд “Эдийн засгийн шинэ бодлого хэрэгжүүлж эхэлсэнтэй холбогдуулан эрчим хүчний салбарт илүү уян хатан бодлого хэрэгтэй болсон тул эрчим хүчний салбарыг хувьчилж, өдрийн цагийн цахилгаан хэрэглээний үнийг чөлөөллөө” гэж өнгөрсөн баасан гаригт нийтэлжээ.

Олон жилийн турш социализмын замаар замнасан тус улс ийнхүү өнгөрсөн жилээс хэрэгжүүлсэн эдийн засгийн нээлттэй бодлогоо ийнхүү эрчим хүчний салбарт хэрэгжүүлж эхэллээ. “Хувийн хэвшлийг дэмжиж олон нийтэд нээлттэй эдийн засгийн бодлогыг баримталж байгаа нь Кубыг эдийн засгийн таатай нөхцөлд аваачиж магадгүй” гэж олон улсын ажиглагчид үзэж байна. Энэхүү бодлогын анхны санааг 2003 онд гаргасан бөгөөд шаардлагатай судалгаа сэлтийг боловсруулан өнгөрөгч баасан гаригаас эхлэн бодитой хэрэгжүүлж байгаа юм.

Раул Кастрогийн хэрэгжүүлж байгаа эдийн засгийн шинэ бодлого нь эхний ээлжинд Кубад ямар өөрчлөлт авчрахыг таамаглах аргагүй ч төсөөлж байснаас илүү эрсдэл ч хүлээж байж болох. Учир нь эдийн засгийн огцом өөрчлөлт тус улсад сүүлийн хэдэн жилийн турш тохиож байгаагүй хямралыг үүсгэж болох бөгөөд төрийн систем социализмын хэлбэрээр байгаа нөхцөлд эдийн засгийн капиталист өөрчлөлт хэр нийцэх нь одоо ч бүрхэг хэвээр байна. Эдийн засгийн шинэ бодлогыг хэрэгжүүлж эхэлж байгаатай холбогдуулан олон арван хувь хүмүүс цайны газар, ресторан дэлгүүр зэргийг нээх хүсэлтээ Кубын сангийн яам руу илгээгээд байгаа ажээ.