Аж үйлдвэржилт өндөр түвшинд хөгжсөн, тэр хэрээрээ коксжих нүүрсний хэрэглээ өндөртэй байдаг Япон улс Монголоос баяжуулсан коксжих нүүрс импортолж эхэлсэн байна. Өнөөг хүртэл Японы коксжих нүүрсний хэрэглээний дийлэнхийг Канад, Австрали, ОХУ, АНУ-аас хангаж байсан бол өнгөрсөн онд Япон улс дээрхи орнуудаас гадна Монгол болон Мозамбик улсаас коксжих нүүрс импортолсон байна. Тус улсын Сангийн яамнаас 2013 оны 1-р сард гаргасан статистик мэдээллээс харахад Япон улс 2012 онд Мозамбикаас 89,8 мянган тонн нүүрс, Вакаяамагийн боомтоор дамжуулан Монголоос 19,2 мянган тонн баяжуулсан коксжих нүүрс тус тус импортолжээ. Энэхүү нийлүүлэлтийг манай улсаас Энержи Ресурс ХХК хийсэн байна. Тус компани нь Монголын нүүрсний салбарт анх удаа коксжих нүүрсийг боловсруулж, нэмүү өртөг шингээн экспортолж байгаа билээ.

Урд хөршид экспортолдог хэмжээтэй харьцуулахад Японд туршилтаар нийлүүлсэн нүүрсний хэмжээ бага боловч өндөр хөгжилтэй орны эцсийн хэрэглэгчдийн шалгуурт нийцүүлж, зах зээлийн шинэ гарц нээж байгаа гэдэг утгаараа ач холбогдол өндөртэй юм. Цаашлаад энэ нь сайн чанарын коксжих нүүрсийг дотооддоо боловсруулж, өрсөлдөх чадварыг нь нэмэгдүүлвэл дэлхийн зах зээлд хүргэн худалдах боломж бий гэдгийг харуулж байна.