Улсын Ерөнхий прокурорын дэргэдэх зөвлөлийн арванхоёрдугаар сарын 0 1-ний өдрийн хуралдаанаар “Шүүх эрх мэдлийн шинэтгэлийг гүнзгийрүүлэх хөтөлбөр”-ийг хэрэгжүүлэх ажлын хүрээнд Улсын Ерөнхий прокуророос Улсын Дээд шүүхийн Ерөнхий шүүгч, Хууль зүй, Дотоод хэргийн сайдтай хамтарч гаргасан “Хуулийн байгууллагын ажилтнуудын сахилга хариуцлагыг сайжруулах тухай” 2011 оны 87/111/118 тоот хамтарсан захирамж, тушаал, Улсын Ерөнхий прокурорын “Прокурорын байгууллагын албаны хариуцлагын тогтолцоог сайжруулах талаар дагаж мөрдөх журам” батлах тухай 2011 оны 94 тоот тушаал, мөн оны 1/01 тоот албан даалгаврыг хэрэгжүүлэх талаар Аймаг, Нийслэл, Тээвэр, Дүүрэг, Сум, Сум дундын прокурорын газраас зохиосон ажлын дүнг хэлэлцэв.

Дээрх шийдвэрүүдийг хэрэгжүүлэх, ялангуяа архидан согтуурахтай тэмцэх ажилд зарим ахиц гарсан байгаа боловч прокурор, хэрэг бүртгэгч, мөрдөн байцаагчийн хариуцлагыг сайжруулах, мэргэжлийн ур чадварыг дээшлүүлэх, ёс зүйг дагаж мөрдөх талаар хангалтгүй байна гэж Зөвлөлийн хурлаас дүгнэв. Зөвлөлийн хурлаас дээрх хамтарсан захирамж, тушаал болон Улсын Ерөнхий прокурорын тушаал, албан даалгаврыг хэрэгжүүлэх ажлыг эрчимжүүлж, хариуцлагын шинэ шаардлагыг бүрэн хэрэгжүүлж ажиллах талаар Аймаг, Нийслэл, Тээвэр, Дүүргийн прокуроруудад үүрэг болгон, биелэлтэнд хяналт тавьж ажиллахыг Улсын Ерөнхий прокурорын газрын Тамгын хэлтэст даалгажээ гэж Улсын Ерөнхий прокурорын Хэвлэл, мэдээллийн албанаас мэдээллээ.