Монгол Улсын Засгийн газар нь 20 дахь жилдээ Гадаад түншүүдийн техникийн уулзалтыг зохион байгуулж байна. Тус уулзалтад өнөөдөр Засгийн газрын хэрэг эрхлэх газрын дарга Ч.Хүрэлбаатар “Засаглал” сэдвээр илтгэл тавилаа. Монгол Улсын эдийн засгийн өсөлт нь дунд болон ойрын хугацаанд өндөр болох төлөв харагдаж буй. Гол нь эдийн засгийн өсөлт ард иргэдэд хэрхэн өгөөжөө өгөх вэ гэдэг нь чухал асуудлын нэг болж буй тул Монгол Улсын Засгийн газар үүнд анхаарлаа хандуулан бодлого боловсруулан ажиллаж байна гэдгээ донорууддаа уламжиллаа. Эдийн засгийн өндөр өсөлтийг үр дүнтэй ашиглахад төр хувийн хэвшил, иргэний нийгмийн хамтын зөв оновчтой бодлого,  ажиллагаа чухал болж байгаа аж. Тиймээс энэ чиглэлээр зарим ажлуудыг эхлүүлжээ. Тухайлбал, хүн амын төвлөрлийг сааруулж, орон нутаг бие даан хөгжих боломжийг хангах зорилгоор Төсвийн тогтвортой байдлын тухай, Концессын тухай хуулийг батлан гаргасан.  Мөн УИХ-ын хаврын чуулганаар Тендерийн тухай хуулийг батална. Дээрх хууль батлагдсанаар бүх яамд тендерээс салж, зөвхөн бодлого боловсруулах шатанд ажлаа чиглүүлнэ. Төрийн зарим ажил үйлчилгээг Мэргэжлийн холбоод, төрийн бус байгууллагад шилжүүлнэ. УИХ-аас төрийн албанд шинэчлэл хийх үүргийг өгсөн. Энэ дагуу төрийн албан дахь ажлын давхардлаас гадна бусад тогтоол шийдвэрүүдийн давхардлыг арилгахаар ажиллаж байгааг энэ үеэр онцлов.
Мөн Сангийн сайд С.Баярцогт гадаадын түншүүдэд хандаж хэлсэн үгэндээ энэ удаагийн уулзалт хоёр зүйлээр онцлог болж байгааг дуулгав. Нэгд Монгол Улс 20 дахь удаагаа зохион байгуулж байгаа гадаад түншүүдийн техникийн уулзалт дээр шилжилт дуусч, хөгжлийн шинэ шатанд гарснаа зарласан явдал боллоо.  Тодруулж хэлбэл, Монгол Улс өнгөрсөн 20 жилийн турш гадаадын түншүүдээсээ зөвхөн хөнгөлөлттэй зээл,  буцалтгүй тусламж үзүүлэхийг санал болгодог байсан бол одоо тэдгээртэй ижил төвшинд харилцахыг хүсч, өндөр эдийн засгийн өсөлтийг хэрхэн үр дүнтэй ашиглах боломж байдаг талаар зөвлөмж өгч, туршлагаасаа хуваалцахыг хүсч байна. Учир нь эдийн засгийн энэхүү өндөр өсөлтийг дагаад  баялаг бий болох ч гэлээ Монгол Улсын хувьд урьд өмнө нүүр тулж байгаагүй маш хүнд сорилтуудтай тулгарах болж буй тул түүнээс гарах арга замыг тодорхойлоход энэ удаагийн техникийн уулзалтын ач холбогдол оршиж байна. Гадаад түншүүдийн техникийн уулзалтад Засгийн газрын гишүүдээс гадна гадаадаас Монгол Улсад суух Элчин сайдууд, Олон улсын байгууллагын суурин төлөөлөгчид болон Монгол Улсын хөгжлийн бүх түншүүдийн төлөөлөл нийт 100 орчим төлөөлөгч оролцож байна.

Г.Дарь