Монголбанкны Хяналтын зөвлөл өнгөрсөн баасан гаригт хуралдаж, 2010 оны Монголбанкны захиргаа, аж ахуйн төсөв, зардлын болон хөрөнгө оруулалтын төлөвлөгөөний гүйцэтгэлийг хэлэлцжээ. Хяналтын зөвлөл Монголбанкны удирдлагад зөвлөмж хүргүүлэхээр тогтсон байна. Үүнд хэд хэдэн заалт байгаа бөгөөд Монголбанкны төсөвт тодотгол хийх шаардлага гарсан үед орлого, зарлагыг өөрчлөхөд хүргэж байгаа хүчин зүйлүүдийг нэг бүрчлэн тооцож болзошгүй зардлын санг бий болгох үндсэн дээр төсвийн тодотгол хийхээс аль болох зайлсхийхийг сануулжээ.

Төв банк өнгөрсөн онд аж ахуйн үйл ажиллагаанаас 642.2  сая төгрөгийн орлого оруулж, 8,439.0  сая төгрөг зарцуулахаар төлөвлөж гүйцэтгэлээр 502.5  сая төгрөгийн орлого оруулж орлогын төлөвлөгөө 21.8  хувиар тасарчээ. Хяналтын зөвлөл энэ асуудлыг авч хэлэлцээд зарим орлогыг үндэслэл муутай төлөвлөсөнтэй холбоотой гэж үзсэн байна.

Хяналтын зөвлөлөөс төсөв,  хөрөнгө оруулалтын чиглэлээр 2009, 2010  онд Монголбанкны Ерөнхийлөгчид давхардсан тоогоор есөн заалт бүхий зөвлөмж өгсний хэрэгжилт сайнгүй байгааг Хяналтын зөвлөлийн хурлаас тэмдэглэжээ.