Хүрээний бузрыг ухвал далай цаашаа л гэдэг. Тэгвэл “Go Mongolia”-ын зарцуулсан хөрөнгийг ухвал хүрээний бузарч жижигдэж мэднэ.

Л.Оюун-Эрдэнэ анх 2021 онд Ерөнхий сайдаар томилогдож, Засгийн газрын бүтэц бүрэлдэхүүнээ зурахдаа Соёлын яам байгуулсан. Камерын өмнө тэрбээр соёлын бодлого хариуцсан яам байгуулахаар болсноо тайлбарлахдаа өв соёлоо дэлхий нийтэд сурталчилан таниулах зорилготой гэж байв. Гэвч цаанаа бол Соёлын яамаар дамжуулан, авлига, хулгайн мөнгийг угаадаг байсан уу гэдэг нь өнөөдрийн асуултын тэмдэг. Тэр тусмаа  улсын төсөв захиран зарцуулдаг Гүйцэтгэх засаглалын тэргүүний төрсөн хүү болон төрсөн ахтай холбоотой тансаг хэрэглээний ард Соёлын яам чухамдаа “Херо энтертаймент”-ын хэтэвч байсан уу гэх хардлага олон нийтэд төрөх нь зүй ёсных.

Учир нь, өнгөрсөн дөрвөн жил Соёлын сайдыг төсвийн хөрөнгөөр туйлж байна гэх шүүмжлэл гардаг ч Ерөнхий сайд асан Л.Оюун-Эрдэнэ “гөлөөг” ч гэж тоож байгаагүй нь тэд ашиг сонирхол нэгтэй байсантай холбоотойг үгүйсгэхгүй.

Ямар ч байсан Ч.Номинтой холбоотой багагүй баримт дэлгэгддэг ч хууль хүчнийхэн нүдээ таглаад, чихээ бөглөөд өнгөрдөг нь худлаа биш юм. Соёл, спорт залуучуудын сайд байхдаа Ч.Номин Соёлын бүтээлч сар аянд нийтдээ 489 сая төгрөг зарцуулсан нь багагүй шүүмжлэл дагуулж байлаа. Тэгвэл өнгөрсөн онд Ч.Номин гадаад томилолтын зардалдаа 344 сая төгрөг улсын төсвөөс гаргуулсан гэх баримтыг намын гишүүн шилэн Цогоо дэлгэж байсан билээ. Мөн 2025 оны улсын төсвийн хэлэлцүүлгийг Ч.Номингийн хамаарал бүхий “Тэрэлж хотел”-д 50 сая төгрөгөөр хийсэн болохыг ч шилэн Цогоо илчилж байсан нь хагас жилийн өмнөх үйл явдал.

Л.Оюун-Эрдэнийн өмнөх Засгийн газар 2023-2025 оныг Монголд зочлох жил болгон зарлаж, 400 сая жуулчин татах сурталчилгааг Соёлын сайд Ч.Номинд хариуцуулсан. Үндсэндээ, гадаадад Монголыг таниулах нэрээр дэлхийн нэртэй инфлүүсэрүүдийг өндөр үнээр хөлслөхөөс гадна “Go Mongolia” брэндингийн хүрээнд  Английн алдарт “Фүлхэм”-тэй олон тэрбум ам.долларын хамтран ажиллах гэрээ байгуулсан. Гэхдээ Английн алдарт “Фүлхэм”-тэй байгуулсан гэрээ нь нууц, мөнгөн дүн бас нууц. Гэрээгээ нууцлах тусам тэнд нууц зүйл маш их байгаа гэсэн үг.

Түүнчлэн гадаадын өндөр үнэ, ханштай дэлхийн инфлүүсэрүүдийг Монголын татвар төлөгчдийн мөнгөөр урьж авчрахдаа хэчнээн хэмжээний хөрөнгө мөнгөөр зарцуулсан талаарх зардлын тайлангаа Засгийн газар ч, Соёлын сайд Ч.Номин аль аль нь өнөөг хүртэл тавиагүй байгаа юм.

Тиймээс Соёлын сайд Ч.Номингийн  “Монгол Улсыг олон Улсад илэрхийлэх түлхүүр үг бол “GO MONGOLIA” болж, энэ нь залуус давамгайлсан өнөөгийн нийгэмд “Өөдөө тэмүүлэх Монгол” гэдэг утгыг оруулсан юм. Өөрөөр хэлбэл олон Улсад “Монголд зочилж шинийг мэдэр”, “Монголд очиж өөр хаана ч олохгүй шинэ боломжийг ол” гэх мэт салбар бүрийг сурталчилж болох өргөн утга, агуулгыг багтаасан энгийн, оновчтой түлхүүр үг болсон. “Go Mongolia” түлхүүр үгийг “Mongolia.Always.Moving” гэх уриа үгс дагалдах ба зогсолтгүй шинэчлэгдэх, сэтгэл хөдөлгөм гэсэн агуулгыг илэрхийлнэ” гэж танилцуулж асан үндэсний брэндингийн төсөв мөнгийг ухвал хүрээний бузар цаашаа болж магадгүй байна.

Учир нь, Г.Занданшатарын танхимд багтах зайгүй болсон Ч.Номин ордны бослогыг толгойлж, засгийн үйл ажиллагааг үхэн хатан бойктлох болсны ард “Херо энтертаймент”-тай хэтэвч нэг явсан хулгай луйвар, хууль бус мөнгө угаалт илчлэгдэх вий гэсэн айдас, болгоомжлол байгааг хэн мэдлээ.

Ямар ч байсан Ерөнхий сайд асан Л.Оюун-Эрдэнийн ахтайгаа хамтран эзэмшдэг “Херо энтертаймент” цахим наадмыг хариуцсан гэж төсвөөс 10 тэрбумыг авсныг Соёлын дэд сайд асан М.Батбаяр хүлээн зөвшөөрсөн бичлэг хүртэл бий.

Дүү нь Ерөнхий сайд байтал ах нь улсын төсвийн ажил үйлчилгээ авахыг уг нь Ашиг сонирхлын хуулиар хориглосон.  Харамсалтай нь, ах дүү хоёрт Монголын хууль бол гууль шүү дээ.

Б.БАТ