Өчигдөр төрийн ордонд Засгийн газрын бүрэлдэхүүнд өөрчлөлт оруулж магадгүй гэнэ. Ингэхдээ Нийгмийн хамгаалал, хөдөлмөрийн сайд Т.Гандиг УИХ-ын гишүүн Д.Оюунхоролоор солих тухай, мөн Хүнс, хөдөө аж ахуй, хөнгөн үйлдвэрийн сайд Т.Бадамжунайн суудал ч ганхаж байна гэсэн мэдээлэл тарсан юм. Уг мэдээлэл хэр ул үндэстэй болох талаар албаны зарим хүний үгийг сонслоо.

Засгийн газрын Хэрэг эрхлэх газрын дарга Ч.Хүрэлбаатар:

-Энэ бол ор үндэслэлгүй зохиомол мэдээ байна. Засгийн газрын бүрэлдэхүүнд өөрчлөлт оруулах талаар огт яриагүй. Засгийн газрыг хөдөлгөнө гэдэг зүгээр л цуу яриа биз дээ.

Ерөнхий сайдын зөвлөх Г.Өнөрбаяр:

-Ийм яриа Засгийн газраас лав гараагүй. Ер нь Засгийн газрын бүрэлдэхүүнээр оролдож суудаг цаг ч биш. Хийх ажил асар их байна. Зүгээр л амьдралыг сонирхолтой болгож, үйл явдал өрнөж байгаа мэтээр харагдуулах гэсэн цуурхал биз ээ.