Их Британийн хүнд жингийн боксер Дэвид Хэй өчигдөр Английн Манчестер хотноо АНУ-ын Жон Руизийг буулган авч, WBA-ын хүнд жингийн дэлхийн аваргын бүсээ хамгаалах анхны тулаандаа ялалт байгууллаа. 20 мянга гаруй мэргэжлийн тулаан сонирхогчдыг цуглуулсан хоёр тамирчны тулааны эхнээс л эцэс хүртэл Хэй илүүрхсэн талаар хэвлэл мэдээллээр шуугиж байна. Тэрбээр өрсөлдөгчөө ес дэх раундад нам цохисноор тулаан өндөрлөжээ. Өдгөө 38 настай Руиз дэлхийн хүнд жингийн хоёр удаагийн аварга бол 29 настай Хэй хагас дунд жингээс жин өгсөн тулалдах болсноос хойш ердөө гуравхан удаа хүнд жингийн тулаанчны хувиар боксын рингэнд гарсан юм. Тулааны өмнөх хэвлэлийн бага хурлын үеэр Хэй “Би ямар нэг сэтгэл хөдөлгөсөн, хүмүүсийг шоконд оруулсан зүйл хийх болно. Өрсөлдөөнтэй, ширүүн тулаан болно гэж бодож байна. Жон Руиз бол хатуу самар гэдгийг би маш сайн мэдэж байгаа. Гэхдээ би бүтэн 12 раундын турш түүнийг үгүй хийхээр дайрах болно. Харин үүнийг тэсч, давж гарах хүн байхгүй л болов уу” гэжээ.

Лас-Вегаст амьдардаг Жон Руиз хэрэв тулаанд ялалт байгуулсан бол хүнд жингийн дэлхийн аваргын бүсээ гурвантаа хамгаалсан элит боксчдын эгнээнд багтах байсан юм. Мэргэжлийн тулааны спортын түүхэнд ердөө Мухаммад Али, Эвандер Холифилд, Леннокс Льюис нарын гурван боксчин л хүнд жингийн дэлхийн аваргын бүсээ гурав ба түүнээс олон удаа амжилттай хамгаалж байжээ.