Шинэ хавдрын эмнэлгийн эмч, сувилагчийг АНУ-д бэлдэнэ

Шинээр барих хавдрын эмнэлэгт ажиллах эмч, мэргэжилтнүүдийг АНУ-ын Юта мужийн их сургуульд бэлдэх гэнэ. Монгол Улсын Ерөнхийлөгч У.Хүрэлсүх захирамж гарган, “Хавдар судлалын үндэсний хоёрдугаар төвийг барихад дэмжлэг үзүүлэх ажлын хэсэг байгуулсан. Ажлын хэсгийн бүрэлдэхүүний төлөөллийн хамтаар АНУ-ын Юта мужийн их сургуулийн төлөөлөгчтэй хийх хамтын ажиллагааны албан уулзалтыг зохион байгуулжээ.

Уулзалтаар АНУ-ын Юта мужийн их сургууль болон Монгол Улсын АШУҮИС, ХСҮТ-ийн хооронд хамтран ажиллах санамж бичигт гарын үсэг зурсан байна.

Ингэснээр АНУ-ын Юта мужийн их сургуульд Монгол Улсын АШУҮИС-ийн багш, оюутан, эрдэм шинжилгээний ажилтанг сургаж, шинээр байгуулах хавдар судлалын үндэсний хоёрдугаар төвд ажиллах эмч, сувилагчийг бэлтгэхээр болсон байна.

Улсдаа ганц Хавдар судлалын үндэсний төв ачааллаа дийлэхээ больсон. Шинэ эмнэлэг барих асуудлыг олон жил ярьсан ч ажил болгож чадалгүй өдийг хүрсэн. Тиймээс 2025 оны төсөвт шинэ эмнэлгийн дэд бүтцэд 7.9 тэрбум төгрөг төсөвлөсөн юм.

Зураг төсөлгүй гэдэг шалтгаанаар олон жил улсын төсвөөс хасагдсан шинэ эмнэлгийн зураг төслийг гурван тэрбум төгрөгөөр "Бодь пропертийз" компани хийхээр тендерт шалгарч, нийслэлийн Сонгинохайрхан дүүргийн 34 дугээр хороонд 12 га газарт барихаар болсон.

Тодруулбал, "Найрамдал" олон улсын хүүхдийн зуслангийн наана буюу "Буман-Өлзий" хорооллын орчимд тус эмнэлгийг барихаар болсон юм.

"Өмнө нь жилд 6500 орчим хорт хавдар оношлогддог байсан бол энэ жил 7200 болж нэмэгдсэн. Удахгүй 8000-д хүрнэ. Харин хорт хавдрын шалтгаант нас баралтыг нэг түвшинд барьж чадаж байгаа. Бид нас баралт, өвчлөл хоёрын зайг холдуулж чадаж байгаа ч байраа томруулж, эмчилгээндээ орчин үеийн шинэ технологийг нэвтрүүлмээр байна. Монголын эрүүл мэндэд дэвшилтэт технологиудыг нэвтрүүлж, ажилтнуудаа сургах хэрэгтэй.

Гэтэл бид бүхэн өдөрт хандаж буй өвчтөнүүдийнхээ араас гарч чадахгүй байна. Мөн эмчилгээний өртөг нь бага учраас илүү ажлыг хийж, хэрэгжүүлж чадахгүй байна.

Эмнэлгийнхээ барилгыг өргөтгөж, хэмжээг нь томруулахаар олон жил хичээж байна. Энэ жилээс шинэ эмнэлэг барих газрын асуудал шийдэгдсэн. Өнгөрсөн 10 жилийн хугацаанд яригдсан шинэ эмнэлгийн асуудлыг шийдэж чадвал 7-8 жилийн дараа орчин үеийн агааржилттай, эмчлүүлэгчдийн шарх нь бохирддоггүй, хагалгааны дараах хүндрэл үүсэх эрсдэлгүй ажилчдадаа болон үйлчлүүлэгчдэд ээлтэй эмнэлэгтэй болно гэж найдаж байна" гэдгийг ХСҮТ-ийн захирал Н.Эрдэнэхүү өмнө нь хэлж байв.