Өнөөдөр 11 цагаас Сүхбаатарын талбайд  “Интернэттэй талбай” нэртэй утасгүй интернэтийн байнгын үнэгүй үйлчилгээг нэвтрүүлэх нээлтийн өдөрлөг болно. Энэхүү өдөрлөгийг нийслэлийн Мэдээллийн технологийн газар болон ”Телемакс коммуникэйшн” ХХК хамтран Улаанбаатар хот үүсч байгуулагдсаны 371 жилийн ой, “Нийслэлийн өдөр”-ийг тохиолдуулан зохион байгуулж байгаа аж. Мөн тус өдөрлөгт MCSCom ХХК оролцож шинэ технологийн танилцуулгаа хийх юм байна.

Энэ үеэр өдөрлөгт хүрэлцэн ирсэн иргэдийн дунд хөдөлгөөнт интернэт ашиглан  мэдээлэл хайх “Google-ээс асуу” нэртэй хөгжөөнт уралдаан зохион байгуулна. Уралдаанд оролцохыг хүссэн хүн бүхэн өөрийн WiFi холболттой бүх төрлийн ipad, гар утас болон зөөврийн компьютертойгоо очиж, ялагч болох боломжтой гэнэ.  Түрүүлсэн ялагчид нэг жилийн эрхтэй 4G Modem, “Телемакс коммуникэйшн” ХХК-ий  нэрийн бэлэг гардуулах аж.