Энэтхэгийн нийслэл Дели хотын нэгэн эмнэлэгт гал гарч, улмаар таван нялх хүүхэд амь эрсэджээ. Мөрдөн байцаалтын явцад тус эмнэлэг үйлчилгээ эрхлэх тусгай зөвшөөрөлгүй байсан нь тогтоогдсон. Өнгөрсөн Бямба гаригт гал гарсан бөгөөд түймрээс хамгаалах багаж хэрэгсэл, гарц байгаагүй аж. Цагдаа нар тухайн эмнэлгийн захирал болон хэрэг гарах үед ажиллаж  байсан эмч, сувилагч нарыг баривчилжээ. Тэднийг санаатай хүн амины хэрэгт буруутгаж байна. Хүүхдүүдийг хариуцаж байсан доктор Акаш нь эрчимт эмчилгээ шаардлагатай шинэ төрсөн нярайг эмчлэх чадваргүй байсан гэж цагдаа нар мэдэгджээ.

Энэтхэгт аюулгүй байдлын стандарт хангалтгүй тул орон сууц, үйлчилгээний байгууламжуудад гал гарах нь элбэг. Вивек Вихар дүүргийн эмнэлэгт гарсан гал түймэр эмгэнэлт явдлыг дагуулсан тул засгийн газраас улсын бүх эмнэлгүүдэд хяналт оруулахыг тушаав. Цагдаагийн комиссар Шахдара Сурендра Чаудхари мэдээлснээр, тус эмнэлгийн "NOC" (Тасалгаагүй гэрчилгээ) үйлчилгээ эрхлэх зөвшөөрөл гуравдугаар сарын 31-нд дууссан байсан. Мөн 15 метрээс өндөр эмнэлгийн барилгуудыг галын аюулгүй байдлын стандарт хангасан байх шаардлага Энэтхэгт тавьдаг ч тухайн эмнэлэг шаардлага хангаагүй байжээ.

Гал унтраах албаны захирал Атул Гарг мэдээлснээр, эмнэлэгт 12 нярай хүүхэд эмчлүүлж байсан. Тэдний тав нь амь эрсдэж, үлдсэн хүүхдүүдийг өөр эмнэлэг рүү шилжүүлжээ. Мөрдлөгийн явцад хүчилтөрөгчийн баллон дэлбэрсний улмаас гал тархсан нь тогтоогдсон. Ерөнхий сайд Нарендра Моди хэргийг "зүрх өвтгөсөн" гэж тодорхойлж, нас барсан нярай хүүхдүүдийн ар гэрт 2407 ам.доллар, шархадсан хүмүүст тус бүр 600 ам.доллар олгохоо мэдэгдэв.

Эх сурвалж: BBC