Чөлөөт бөхийн Дэлхийн аварга шалгаруулах тэмцээн Узбекийн Ташкент хотноо эмэгтэйчүүдийн тэмцээнээр үргэлжилж байна.

Өнөөдөр эмэгтэйчүүдийн 53, 58, 75 кг жингийн барилдаан болж, медалтнууд тодорно.

Тэмцээний 75 кг-ын жинд барилдаж буй ДАШТ-ий мөнгө, хүрэл медальт, Монгол Улсын Гавьяат тамирчин Очирбатын Бурмаа мөнгөн медалийн төлөөх барилдаанд Бразилийн бөх Алинэ Да Силвад 2:5 харьцаагаар ялагдаж, хүрэл медалийн төлөө Колумбийн А.Олаятай барилдахаар боллоо.

О.Бурмаа эхний тойрогт гоц мөргөж, хоёрдугаар тойрогт дэлхийн аваргын алт, хүрэл медальт, Европын хошой аварга Украины Катерина Бурмистроватай барилдаж, 5:0-ийн харьцаагаар ялснаар шөвгийн наймд шалгарсан. Дэлхийн тав, Европын зургаан удаагийн аварга Болгарын бөх Станка Златеватай барилдаж, 6:3-ийн харьцаагаар ялснаар шилдэг дөрөвт багтсан. О.Бурмаагийн хувьд энэхүү барилдаан маш хүнд болсон бөгөөд 1:3-аар ялагдаж явсан тэрээр сүүлийн 5 секундын өмнө 4 оноо авч ялсан юм. Болгарын дасгалжуулагч барилдааныг нягталж харах хүсэлт гаргасан ч шүүгчийн шийдвэр хэвээр үлдэж манай бөхөд 1+ оноо өгснөөр барилдаан 6:3-ийн харьцаагаар О.Бурмаагийн ялалтаар өндөрлөсөн.

Мөнгөн медалийн төлөө О.Бурмаа Бразилийн бөх Алинэ Да Силвад 2:5-ын харьцаагаар ялагдсанаар хүрэл медалийн төлөө Колумбийн А.Олаятай барилдахаар шалгараад байна.

Тэмцээний 58 кг-д ДАШТ-ний хошой хүрэл, Ази тивийн аварга шалгаруулах тэмцээний мөнгөн медальт, Т.Мөнхтуяа эхний барилдаанд Бразилийн бөх Жойс Соузатай барилдаж 6:4 харьцаагаар ялсан ч удаах тойрогт ДАШТ-ний хүрэл медальт, Европийн аварга ОХУ-ын бөх Валерия Кобловатай барилдаж 10:0 харьцаагаар оноогоор цэвэр ялагдсан. Түүнийг ялсан Коблова Турк, Эквадерийн бөхчүүдийг ялснаар алтан медалийн төлөө барилдахаар шалгарлаа.

Т.Мөнхтуяа дагах барилдаанд Италийн бөх Карола Рэйнеротой барилдаж 14:4 харьцаагаар ялсан ч Туркийн бөхөд 0:8-ийн харьцаагаар ялагдснаар тэмцээнээ дуусгалаа.

Тэмцээний 53 кг-ын жинд ДАШТ-ний мөнгөн медальт, Олон улсын хэмжээний мастер Э.Сумьяа нэгдүгээр тойрогт Энэтхэгийн бөх Нурмала Дэвиг даралтаар цэвэр ялсан ч хоёрдугаар тойрогт Дэлхийн залуучуудын аварга АНУ-ын бөх Уитни Кондортой барилдаж, оноо тэнцсэн ч сүүлд оноо алдсанаараа ялагдлаа. (I үед 2:2, II үед 2:2) АНУ-ын бөх шөвгийн наймд ялагдсанаар хүрэл медалийн төлөө дагах барилдаан хийх аж.

Ийнхүү өнөөдөр дэвжээнд гарсан манай гурван бөхчүүдээс 75 кг-ын жинд ДАШТ-ий мөнгө, хүрэл медальт, Монгол Улсын Гавьяат тамирчин Очирбатын Бурмаа хүрэл медалийн төлөө Колумбийн А.Олаятай барилдахаар шалгарлаа. Шигшээ барилдаан 21.00 цагаас эхэлнэ.

Тэмцээнийг ETV болон http://arena.fila-wrestling.com-с шууд үзээрэй.