2014 оны хөлбөмбөгийн ДАШТ-ий G хэсэгт сугалаа татсан Герман, Португалын шигшээ багийн тоглолт өнөө шөнө 00:00 цагаас /Улаанбаатарын цагаар/ эхэлнэ. Дэлхийн гурван удаагийн аварга, дөрвөн мөнгө, дөрвөн хүрэл медальт, нэг дөрөвдүгээр байрын шагналт Германы шигшээ баг өнөө шөнө “Европийн Бразилчууд” гэгддэг Португалын эсрэг  ДАШТ-ий 100 дахь тоглолтоо хийх гэж байна. Германчууд өмнөх ДАШТ-үүдэд 99 тоглохдоо 60 хожиж, 19 тэнцэж, 20 удаа хожигдсон байна. Мөн 206 гоол оруулж, 117 гоол алджээ. Харин Португалчууд ДАШТ-ий 24 дэх тоглолтоо хийнэ.

Германчууд Португалын шигшээ багийг 2006 оны ДАШТ, 2008, 2012 оны Европийн аварга шалгаруулах тэмцээнд учраа таарахдаа хожсон юм. Хоёр баг 17 удаа учраа таарахад Герман ес хожиж, тав тэнцэн, гурав хожигджээ. 2006 оны ДАШТ-ий хүрэл медалийн төлөө Герман, Португалын шигшээ өрсөлдсөн. Тус тоглолтод Бастиан Швайнштайгер дубль хийж, Петит өөрийн хаалгандаа гоол оруулснаар Герман 3:1-ийн харьцаатай Португалыг хожиж байсан түүхтэй. Өнөө шөнийн тоглолтод Германы хагас хамгаалагч, “Португалын эрлэг” Бастиан Швайнштайгер гэмтлийн улмаас талбайд гарахгүй юм.

ГЕРМАН

Германы шигшээ багийн бүх цаг үеийн мэргэн бууч Мирослав Клозе ДАШТ-д 14 гоол оруулсан юм. ДАШТ-ий бүх цагийн үеийн мэргэн буучийн жагсаалтыг 15 гоол оруулсан Бразилын алдарт Роналдо тэргүүлдэг. Клозе  Роналдогийн амжилтыг давтахын тулд нэг, эвдэхийн тулд хоёр гоол 2014 оны ДАШТ-д оруулахад хангалттай. 

Германчууд 1990 оны ДАШТ-ээс хойш анхны тоглолт бүртээ өрсөлдөгчөө хожжээ. “Герман машинууд” хамгийн сүүлд 1986 оны ДАШТ-ий анхны тоглолтдоо Уругвайтай 1:1-ийн харьцаатай тэнцсэн байх юм.  

Герман 2014 оны ДАШТ-ий урьдчилсан шатны сонгон шалгаруулалтад нийт 36 гоол оруулжээ.

ПОРТУГАЛ

Португалчууд 2002 оны ДАШТ-ий анхны тоглолтдоо АНУ-д 3:2-ын харьцаатай хожигдсон. Харин 2006, 2010 оны ДАШТ-ий анхны тоглолтууддаа хожжээ.

Португалын шигшээн гол найруулагч Жоао Моутиньо ДАШТ-ий урьдчилсан шатанд хамгийн олон буюу 10 гоолын дамжуулалт өгчээ.

 Криштиан Роналду тив, дэлхийн чанартай таван тэмцээнд гоол оруулсан хөлбөмбөгч. Роналду 2004, 2008, 2012 оны Европийн аварга, 2006, 2010 оны ДАШТ-д гоол оруулжээ. Энэ удаагийн ДАШТ-д гоол оруулбал Германы алдарт Юрген Клинсманны  /Одоогийн АНУ-ын дасгалжуулагч/ амжилтыг давтана.

Хөлбөмбөгийн www.goal.com сайтын Герман, Португалын гарааны бүрэлдэхүүн:  

Б.БИЛЭГ