Өндөг тансаг хэрэглээний сагсанд орох болсныг Ерөнхий сайд хэлсэн. Авч чадахгүй бол арвайн гурилаа зуураад тансаг хэрэглээгээ танахыг хэрээрээ зөвлөсөн юм. Үнэхээр өнөөдөр өндөг 500 төгрөг болж, борлуулалт нь буурчээ. Өмнө нь өдөртөө 700-900 мянган төгрөгийн орлого өлхөн олчихдог байснаа одоо ердөө 150-200 мянган төгрөгийн орлогыг арай ядан хийдэг болсон талаар “Хархорин” захын хойхно байрлах “Панда” кафегийн эзэн хэллээ. Түүний хэлснээр захын наймаачид хоол, даруулганы ганц лонх шар айраг авах нь өдөр тутмын хэрэглээ байсан бол одоо орж ирэхээ ч больсон төдийгүй гэрээсээ идэх хоолоо бэлтгэж авчирдаг эсвэл цайны печень, талх, элэгний нухашхнаар аргалчихдаг болсон гэнэ. Ингэх болсон шалтгаан нь захаас иргэд бараа, бүтээгдэхүүн худалдаж авах чадвар муудсантай холбоотой гэж бүгд хүлээн зөвшөөрлөө. Захын наймаачид түрээсээ төлөхөд хүртэл хүндхэн боллоо гэж учирлав. “Талх чихэр” компанийн борлуулалт болон мэргэжилтнүүдтэй уулзахад талхны борлуулалт эрс нэмэгджээ. Талхны борлуулалт тодорхой мөчлөгөөр буурч, өсдөг ч энэ нь түүнтэй холбоогүй гэнэ. Цагаан сарын дараа ул боовоо идээд талх авах хүн олдоггүй тул үйлдвэрлэлээ хязгаарладаг гэж тэд хэлсэн. Тэгвэл хорооллын дунд байрлалтай дэлгүүрүүдийн худалдагч нартай уулзвал нарийн боов худалдаж авах хүн өдрийн од шиг ховордсон тухай гомдоллож сууна. Өмнө нь зарагдаагүй үлдэж, хатсан талхаа үйлдвэрт нь буцаадаг байсан бол өмнөх хэмжээнээсээ хоёр дахин илүү тооны талх авсан ч ядах юмгүй зарчихдаг болсон гэнэ. Үүнтэй “Талх чихэр” компанийнхан ч санал нийлж, талхаа буцааж татдаггүй болсноо дуулгав. Тэд талхных нь борлуулалт өссөнийг шинэ технологи, чанар нь дээшилсэнтэй холбоотой гэж байгаа ч ганц энэ үйлдвэрийн борлуулалт өсөөгүй бусад талхны үйлдвэрүүдийн ч борлуулалт өссөн болохоор түүнийг нь хүлээн зөвшөөрөхөд бэрх аж. Гол нь иргэдийн худалдан авах чадвар доошилжээ. Иргэд нарийн боов, элдэв төрийн нэмэлт бүтээгдэхүүнийг хэрэглээнээсээ хасч, хэмнэлт хийхгүй бол хэцүүдээд эхэлчихэж. Өдийд төгсөх курсын оюутнуудын хөлд дарагдаж, орлого олдог байсан тухайгаа баарны, цэнгээний газрынхан дурсаж сууна.

Урд хөршөөс хог авчирлаа гэж хараалгуулан хувцас, хунар зөөн амьдралаа авч явдаг байсан томоохон дэлгүүрийн лангуу түрээслэгчид зээлээ төлж чадахгүй хүндхэн байдал орсон талаараа ярьж толгой сэгсэрнэ.

Харин манай Засгийн газарт л хэмнэлтийн бодлого алга. Хэмнэлтийн бодлого барихыг шаардаж, хэрэгжүүлэн төрийн яамд, агентлагуудын жийпийг заруулж байсан УИХ-ын гишүүн Лу.Гантөмөр энэ тухай “УИХ-аас Засгийн газрын гишүүн, Боловсролын сайдаар томилогдоод ажиллахдаа би боловсролд шинэчлэл хий гэдэг л үүрэг авсан. Тийм учраас тэр ажлаа л хийж байгаа. Тансаг хэрэглээ, хямд хэрэглээний тухай ойлголт байхгүй л дээ” гэж өмнөхөөсөө тэс хөндлөн юм ярьчихсан тууж явна. Хэдийгээр хотын өмнөх удирдлагуудын тансаглалыг давтахгүй гэж байсан хотын дарга Э.Бат-Үүл “Хоёр жил өмнө өмнөх дарга нь 186 сая төгрөгөөр лексус 570 авсан. Тэрийгээ бараг унаагүй. Яагаад гэвэл ажлаа хаяад явчихсан юм чинь. Энийг нь унахгүй, аваачаад зар гэдэг үүргийг би өгсөн. Манай төрийн өмчийн газар хоёр удаа дуудлага худалдаанд оруулсан. Сүүлд нь аргаа бараад 100 саяас дуудуулсан. Тэрнээс доошоо оруулчихвал хэрэгт орно гээд аргагүйн эрхэнд унаж байгаа л даа” гэчихсэн 570-аа унаад явж байна.

Ийнхүү тансаг хэрэглээг хязгаарлах, хэмнэлтийн бодлого баригчдийн нэг нь бодлоосоо буцсан бол нөгөө нь аргагүйн эрхэнд унаж яваа юмсанж.

Ажиглаад байхад төрийн том том жийп машин буурсан харагдсангүй. Яам болгоны гадаа голдуу “Ланд крузер-200”, “Лексус-570” сойгоотой харагдаж байна. Харин төрийн хэмжээнд тансаг хэрэглээний ийм “хүлэг” хэдээр тоологдохыг тодорхойлсон баримт олдсонгүй.

Иргэд бүсээ чангалаад байгаа ч тэдний татварын мөнгөнөөс багагүй хувь нь төрийн албаныхнын том жийпэнд, тэрнийх нь шатахуунд зарцуулагдаж буй.

Гэтэл эдийн засаг нь өсөлттэй байгаа ч Хятад хэмнэлтийн бодлого барьж байна. Хүлээн авалт, хоолонд зарцуулдаг мөнгөө 2014 онд бүгдийг нь хассан тухай оны эхэнд Гадаад хэргийн орлогч сайд нь танилцуулж байсан. Хятадад үнэтэй цаг зүүхийг хориглоогүй ч тансаг хэрэглээтэй дарга нараа авлигын хэргээр шалгаж өнгөрсөн ганцхан жилийн хугацаанд 180 мянган нөхөрт ял өгчээ. Гэтэл манайд байдал эсрэгээрээ байсаар л байна.

Адаглаад том том жийпээ цөөлчихөд ажил нь явахгүй болчихмооргүйсэн. Мэдээж зам муутай Монголд гадны өндөр хэмжээний айлчлал, хөдөө ажиллахад жийп хэрэгтэй. Тодорхой тооныхыг нь үлдээгээд бусдыг нь төв талбайдаа авчираад зарчихвал яасан юм бэ. Магадгүй улс орноо гэсэн сэтгэлтэй хувийн хэвшлийнхэн зах зээлийн үнээс ч илүүгээр худалдаж авахад бэлэн байгаа гэж мөрийцсөн ч болно.

Нийслэлийн “Хангарьд” ордонг хувийнханд зарах гэж байгаа нь зөв. Дээр нь нэмээд төсвийн хөрөнгөнөөс талыг нь гаргаж, намдаа харамгүй хандивлан босгосон МАН-ын байрыг Улсын өмчид аваад хувийн хэвшлийнхэнд зараад гэр хорооллоо барилгажуулахад зарцуулахад буруудах зүйлгүй. Энхрий хайрт намынхаа төлөө тэгэж хандив өргөсөн МАН-ынхан эх орныхоо төлөө л юм бол энэ зэрэгт горойхгүй байлгүй.

Эрхэм түшээд ээ, хэсэгхэн хугацаанд төв талбайг төрийн том жийпийг дуудах худалдааны бүс болгоё. Дан, давхар дээлнээс ч илүү бодитой бодлого болно.    
Иргэдийн ходоод нь хоржигносон ч бүсээ чангалж, талхнаас өөрийг авч хүчирхгүй болоод буй ахуйд тулгар биетэй эмэгтэй шиг харагддаг төрийн түшээд нь ядаж сунасан гэдсээ татахгүй бол болохгүй биз дээ. Жийп чинь тансаг хэрэглээ биз дээ, Ерөнхий сайд аа?! Эдийн засаг нь хүндхэн байхад заавал жийп унаж байхаар аксент гэдэг аятайхан машинаа уламжлаад унаад, хэмнэе л дээ, тийм үү?