Завхан аймгийн Улиастай сумын Засаг даргын Тамгын газар нь “Олон нийт-цагдаа хамтын ажиллагаа” аяны хүрээнд долоон заалт бүхий ажил төлөвлөн хэрэгжүүлсэн байна. Тухайлбал, иргэдийн хууль эрх зүйн мэдлэгийг дээшлүүлэх чиглэлээр найман хүний бүрэлдэхүүнтэй баг бүрдүүлж, хуулийн мэдлэгээ сорих мэдгэлцээний тэмцээн зохион байгуулсан байна. Түүнчлэн Улиастай сумын  зургаан багийн 120 гаруй иргэнд Олон нийттэй харилцах байцаагч, цагдаагийн ахлах дэслэгч Ж.Баярмаа гэмт хэргээс урьдчилан сэргийлэх чиглэлээр ухуулга, яриа хийж, цагдаагийн байгууллагын үйл ажиллагааг сурталчлан, тэдний санал бодлыг сонссон байна. Аяны хүрээнд “Халаасны хулгай”, “Архины хор”, “Орон байрны хулгай”, “Машины хулгай”, “Зам тээврийн ослоос урьдчилан сэргийлье”, “Хүүхдүүддээ бүү яар” сэдэвт санамж сэрэмжлүүлгийг 300 ширхэгийг  хэвлүүлэн, иргэдэд тараажээ.

Харин Ховд аймгийн цагдаагийн газар нь төв гудамжиндаа байрладаг цахим самбартаа  иргэдийг гэмт хэргээс урьдчилан сэргийлэх ажилд өргөнөөр оролцох, Засгийн газраас хэрэгжүүлж буй “Олон нийт-цагдааг хамтын ажиллагаа” хөтөлбөрт нэгдэхийг уриалсан мэдээ мэдээлэл байрлуулсан байна. Мөн Ховд, Эко, Некст телевизүүдээр ЦЕГ, ХЗДХЯ-ны хамтарсан “Аюулгүй амар тайван амьдрах орчинг бүрдүүлэх үйлст орон нутгийн иргэдийн оролцоох хэрхэн бүрдүүлэх, Олон нийт-цагдаагийн хамтын ажиллагааг төлөвшүүлэх”, “Аюулгүй орчин түүнийг бүүрдүүлэх арга зам”, “Олон нийт-цагдаа хамтын ажиллагааг хөгжүүлэхийн ач холбогдол” сэдэвт видео хичээлүүдийг иргэд олон нийтэд тогтмол сурталчилж  байгаа талаар Нийгмийн хэв журам хамгаалах газраас мэдээллээ.