Хан-Уул дүүргийн шүүхэд өнөөдөр 10.00 цагт эхэлсэн мөрийтэй тоглоомчдын хэргийг шүүх хурал өндөрлөж, шүүх бүрэлдэхүүн шийдвэрээ танилцууллаа. Шүүх бүрэлдэхүүн мэргэжлийн боксчин, Гавьяат тамирчин, Пан Азийн аварга Д.Лхагваа, “Ландага” хочит н.Батцэнгэл, мөрийтэй тоглоомчдын “багш” гэгдэх н.Батцэрэн, Я.Энхбаяр, н.Батдэлгэр, н.Жавхлантөгс нарын 14 холбогдогчтой хэргийг хэлэлцэж, Д.Лхагваа, н.Мөнгөнхүлэг, н.Батсүрэн, н.Нямгэрэл нарыг нэг жилийн тэнсэн харгалзах ялаар шийтгэжээ. Харин үлдсэн 10 холбогдогчийн долоог хэргийг хөөн хэлэлцэх хугацаа дууссан, бусад гурван этгээд гэмт хэрэг хийсэн болох нь нотлогдоогүй хэмээн хэргийг нь хэрэгсэхгүй болгосон байна.

Шүүх хурлыг Хан-Уул дүүргийн ерөнхий шүүгч Ё.Цогтзандан даргалж, улсын яллагчаар М.Бадам, мөн шүүгдэгчдийн өмгөөлөгчид оролцов.