“Долдугаар сарын 1”-ний гэх тодотголтой, цагдаагийн экс-дарга нарт холбогдох хэргийг шүүх хурал өнөөдөр болохоор товлогдоод байсан ч шүүх хурлын товыг хойшлууллаа. Цагдаагийн ерөнхий газрын даргын үүрэг гүйцэтгэгч асан, хошууч генерал Ч.Амарболд, Эргүүл хамгаалалтын газрын дарга асан, цагдаагийн хурандаа Ш.Батсүх, Нийслэлийн цагдаагийн газрын дарга асан, цагдаагийн хурандаа О.Зоригт, тус газрын Хэв журмын хэлтсийн дарга асан, цагдаагийн дэд хурандаа Г.Ганбаатар нарын өмгөөлөгчөөр ажиллаж байсан О.Алтангэрэл, Т.Мөнхдэлгэр, Ц.Итгэлт, Л.Өлзийхүү, Д.Энхтунгалаг нар үйлчлүүлэгчтэйгээ харилцан тохиролцож, өмгөөлөл үзүүлэхээс татгалзсан билээ. Улмаар хуулийн хүрээнд Нийслэлийн өмгөөлөгчдийн холбооноос шүүгдэгчдэд өмгөөлөгч томилсон юм. Харин шүүгдэгчдийн зүгээс өөрсдийн хүсэлтээр сонгосон өмгөөлөгч биш, цаанаас томилсон тул өмгөөлөгчдөөсөө татгалзах, мөн эрүүл мэндийн байдлаас шалтгаалан батлан даалтад гаргах хүсэлт тавьсан ч шүүх бүрэлдэхүүн хүлээж аваагүй байна. Шүүх бүрэлдэхүүний зүгээс шүүгдэгчдэд өмгөөлөгч авах хугацаа олгосон, эрх нь нээлттэй байсан боловч өмгөөлөгч аваагүй тул хуулийн хүрээнд өмгөөлөгч томилсон, харин батлан даалтад гаргах асуудалд Эрүүл мэндийн сайд болон Хууль зүй, дотоод хэргийн сайдын хамтран баталсан журмын дагуу Цагдан хорих 461 дүгээр ангид эрүүл мэндийн үйлчилгээ авч буй тул батлан даалтад гаргах боломжгүй гэж үзсэн байна.
Шинээр томилсон өмгөөлөгчдийн тухайд Цагдаагийн ерөнхий газрын даргын үүрэг гүйцэтгэгч асан, хошууч генерал Ч.Амарболдын өмгөөлөгчөөр Б.Батхуяг, Эргүүл хамгаалалтын газрын дарга асан, цагдаагийн хурандаа Ш.Батсүхийн өмгөөлөгчөөр Л.Даваасүрэн, Нийслэлийн цагдаагийн газрын дарга асан, цагдаагийн хурандаа О.Зоригтын өмгөөлөгчөөр Ж.Энхтуяа, тус газрын Хэв журмын хэлтсийн дарга асан, цагдаагийн дэд хурандаа Г.Ганбаатарын өмгөөлөгчөөр Т.Баярсайхан нарыг томилжээ.
Шүүх бүрэлдэхүүний зүгээс хурлын товыг дөрөвдүгээр сарын 19-ний 10.00 цаг хүртэл хойшлуулсан бөгөөд энэ хугацаанд шинээр томилогдсон өмгөөлөгчид хэрэгтэйгээ танилцах, мөн шүүгдэгчид нэмж өмгөөлөгч авч болох юм.
О.Зоригтын хэрэгт ажиллах болсон өмгөөлөгч Ж.Энхтуяа гуравхан хоногийн дотор хэрэгтэй бүрэн танилцаж амжихгүй тул дөрөвдүгээр сарын 19-нд товлогдсон шүүх хуралд оролцох боломжгүй гэх санал тавьсан боловч шүүх бүрэлдэхүүний зүгээс нэгэнт шийдвэр гарсан тул шүүх хурал товлосон цагтаа болно гэв.
