УИХ-ын чуулганы нэгдсэн хуралдаан одоо үргэлжилж Үндсэн хуулийн Цэцийн дүгнэлтийг үргэлжлүүлэн хэлэлцэх гэж байна. УИХ-ын сонгуулийн зарим хуулийн зүйл заалт Үндсэн хууль зөрчсөн гэсэн Цэцийн дүгнэлтээр их үдэд санал хураах гэсэн боловч АН-ын бүлгийн дарга Ч.Сайханбилэг “Цэцийн дүгнэлтийг хүлээн авахгүй” гэсэн Хууль зүйн байнгын хорооны саналыг дэмжихийг гишүүдээс хүсч санал хураалтыг 15.00 цаг хүртэл хойшлуулахыг хүссэнийг УИХ-ын дарга зөвшөөрсөн юм. Цэцийг дүгнэлтийг УИХ дахь МАН-ын бүлэг хүлээн зөвшөөрнө гэж байгаа бол АН-ын бүлэг эсрэг саналтай байга юм.

Хэрэв Цэцийн дүгнэлтийг хүлээн авбал санал хураалт болоход зургаан сар үлдээд байхад Сонгуулийн хуульд гар хүрч болохгүй гэсэн Үндсэн хуулийн заалтыг зөрчих юм. Үүнээс гадна МАН-ын бүлэг дангаараа Цэцийн дүгнэлтийг хүлээн авсан тохиолдолд төлөөллийн байгууллага болох УИХ-ын зарчмыг зөрчинө. УИХ дахь АН-ын бүлгийг эсрэг байр суурьтай байхад нэг нам дангаараа Цэцийн дүгнэлтийг хүлээн зөвшөөрвөл сонгогчдын төлөөллийн нэг хэсгийн саналыг үл хайхарсан асуудал үүсэх юм. МАН-ын Удирдах зөвлөлийн зүгээс УИХ дахь МАН-ын бүлгийн гишүүдэд “Цэцийн дүгнэлтийг хүлээн ав” гэсэн тулгалт хийж байгаа юм байна. Ингэж УИХ-ын гишүүний бүрэн эрхэд нэг намын Удирдах зөвлөл халдаж таарахгүй гэсэн яриа гишүүдийн дунд гарч эхэлжээ.

Цэцийн дүгнэлтийг УИХ хүлээн авсан тохиолдолд Үндсэн хууль зөрчсөн, төлөөллийн байгууллагын мөн чанарыг алдагдуулж дан нэг намын бүлгийн шийдвэрээр асуудалд хандсан гэсэн үндэслэлээр Монгол Улсын Ерөнхийлөгч хориг тавьж мэдэхээр байдал үүсээд байна.

Иймд одоо болох санал хураалтаар Хууль зүйн байнгын хорооноос гаргасан саналаар  Цэцийн дүгнэлтийг хүлээн авахгүй байх нь зүйтэй гэж УИХ-ын дийлэнх гишүүн үзэж байгаа юм байна.