Нийслэлийн шүүхийн Ерөнхий шүүгч Б.Сарантуяа. Тэрбээр барагтай л бол хэвлэлийнхэнд ам нээдэггүй нэгэн. Хэвлэлд хаалттай байдаг нь мэргэжлийнх нь онцлогтой холбоо­той байх. Харин долоодугаар сарын 1-ний хэрэгт холбогдсон цагдаа­гийн экс дарга нарын хэрэг энэ хатаг­тайг хэвлэлийнхний өмнө сууж, дэлгэрэн­гүй тайлбар хийхэд хүргэв. Цагдаагийн экс дарга нарын асуудал хэчнээн олон хүний анхаарлыг татаж байгаагийн нэг жишээ энэ болов.

Б.Сарантуяа шүүгчийн хувьд эрүү­гийн хэргийн чиглэлээр мэргэш­сэн. Томоо­хон хэргүүдийг шүүж бай­сан туршлагатай. Нийслэлийн шүү­хийн Ерөнхий шүүгч гэдэг утгаараа давж заал­дах шатанд байгаа бүхий л томоо­хон хэрэг түүний гараар дамждаг билээ. Энэ хатагтай долоодугаар сарын 1-ний хэрэгт холбогдсон цагдаа­гийн экс дарга нарыг шүүн таслах ажиллааны хүрээнд гарч буй бүхий л маргаантай асуудлын талаар өөрийн байр сууриа илэрхийлсэн. Хуульд юу гэж заасан байдгийг тайлбарласан гэвэл илүү онож ч мэднэ.  Тэрбээр “Эрүү­гийн байцаан шийтгэх хуулийн дагуу шүүх хуралдааныг хаалттай явуу­лах ёстой. Аль нэг нам эвсэл, хувь хүний шахалтаар шүүх хурлыг нээлт­тэй явуулах бол шүүх өөрөө хууль зөрчиж таарна” гэв. Мөн “Өмгөө­лөгч нар шүүх хуралдааны танхимыг орхиж гарсан нь шүүхийг үл хүндэтгэсэн, шүүн таслах ажиллагаанд санаатайгаар саад учруулсан, шүүхийн бие даасан, хараат бус байдалд бүдүүл­гээр халдсан, холбогдох хууль тог­тоомж болон өмгөөлөгчийн ёс зүйг ноц­той зөрчсөн үйлдэл. Хүн гэдэг амь­тан хөх тэнгэрийн дор төрдөг. Тэгэхдээ хуульд захирагдах учиртай” гэв. Бас шүүгдэгч нарын өмгөөлөгчид хэргийг түдгэлзүүлэхээр Үндсэн хуулийн Цэцэд хандсан талаар “Хэрэг нэгэнт шүүхэд шилжсэн. Тэгэхээр энэ бүх асуудлыг шүүх хуралдаанаар шийдвэрлэнэ. Өөр арга байхгүй” гэсэн тайлбар хийв. Б.Сарантуяа шүүгч шүүхийг ийнхүү өмөөрөв. Харин түүний тайлбарыг няцаах хүн гарч ирэх болов уу.