Өнгөрсөн Ням гаригт хүн бүрийн сониучирхан хүлээдэг Каннын кино наадмын улаан хивсний ёслол боллоо. 76 дахь удаагаа болж буй наадмын улаан хивсний ёслолд энэ жил алдартнууд улаан, цагаан, хар өнгийг голчлон сонгосны дээр нэвт харагдах загвартай гоёлын даашинзууд олон байв. Тэгвэл загварын хамгийн эрсдэлтэй алхмыг Жулиа Фокс хийж,  2023 оны Каннын кино наадмын улаан хивсэн дээр цээж нүцгэлэв. Цээж нүцгэлсэн тэрбээр хөний товчоо мөнгөлөг өнгөөр будаж, хайлж буй мөсний хэлбэртэй тунгалаг хөхний даруулга зүүсэн бөгөөд доогуураа цагаан өнгийн газар шүргэсэн урттай банзал өмссөн байв. Харсан бүхний ам ангаймаар хувцаслалтаа тодотгож, давхар дусал бүхий загвартай алмаазан ээмэг, зүүлтээр гоёжээ. 

Эмх замбараагүй загварын шийдэл бол Жулиагийн нэрийн хуудас. Тэрбээр өнгөрсөн жил "People" сэтгүүлд өгсөн ярилцлагадаа, "Ажилд тохиромжгүй хувцаслалт"-ын загварын сонголтыг хийдэг тухайгаа тайлбарлажээ. Тэрбээр хэт задгай хувцаслалтаараа   папарацци зурагчдад "үйлчилгээ үзүүлдэг" гэж хошигножээ.

Бүтэн 10 хоногийн турш үргэлжилдэг энэ наадам дээр Холливудын одод, загвар өмсөгчид нэг биш, нилээн хэдэн улаан хивсний ёслол, үдэшлэг, арга хэмжээнүүдэд оролцож, өөрсдийн загварын мэдрэмжийг гайхуулдаг. 1946 онд анх зохиогдож байсан Каннын кино наадмын хамгийн том шагнал нь Palme d’Or буюу "Алтан дал мод" юм. Үүнээс гадна шилдэг найруулга, шилдэг зохиол, шилдэг жүжигчин, кино шүүмжлэгчдийн тусгай шагнал зэрэг шагналуудыг гардуулдаг.