“Хүннү эйр” авиа компани ачаа ачиж, даац хэтэрсэн шалтгаанаар зорчигчдынхоо тасалбарыг хүчингүй болгодог. Мөн чиглэлээ өөрчлөн газардах ёсгүй газраа дур мэдэн газарддаг гэх гомдлыг Байгаль орчин, ногоон хөгжлийн яамны Сав газрын удирдлагын хэлтсийн дарга Г.Ганбат өөрийн фейсбүүк хуудсаар дамжуулан илгээжээ. "Байгаль орчин ногоон хөгжлийн яамныхан өнгөрөгч гуравдугаар сарын 17-ны өдөр “Хүннү эйр” компанийн Улаанбаатар-Ховд чиглэлийн MR1022 нислэгээр явахаар захиалга өгч төлбөрөө шилжүүлсэн боловч, таван хүний билетийг даац хэтэрсэн гэх шалтгаанаар цуцалсан мөн зорчигчдоо үлдээгээд ачаагаа авч ниссэн. Тиймээс БОНХЯ-ныхан маргаашийн нислэгээр явахаар болж, нэг өдөр ажлаа алдсан. Гэтэл 03 дугаар сарын 27-ны өдрийн 08.40 цагт Даланзадгадад газардах ёстой байсан Улаанбаатар-Даланзадгад чиглэлийн MR1011 нислэг чиглэлээ өөрчлөн “Овоот” нисэх буудал газардсан байх юм. Шалтгаан нь Гаалийн ерөнхий газрын дэд дарга тэргүүтэй хэсэг хүмүүсийг “Овоот” нисэх буудалд буулгах ёстой байж. Үүнээс болоод уг нислэгээр зорчсон БОНХЯ-ны мэргэжилтнүүд бас л ажлаа алдсан" гэх мэдээллийн дагуу бид “Хүннү эйр” авиа компани маркетинг, борлуулалтын хэлтсийн ерөнхий менежер Б.Баясгалангаас тодрууллаа.

-Өчигдөр Улаанбаатараас Даланзадгад руу ниссэн онгоц чиглэлээ өөрчлөн “Овоот” нисэх буудал газардсан гэх мэдээллийг зорчигчид өгөөд байна?

-Зорчигчдод мэдэгдэхгүй чиглэлээ өөрчилж ниссэн зүйл болоогүй. Орон нутгийн нислэг буюу Даланзадгад, Овоот хоёр нэг чиглэлийнх. “Овоот”-ын нисэх онгоцны буудал дээр бид зорчигчдоо буулгах ёстой. Эргээд  Даланзадгад руу нисэхэд 40-50 минут болдог.

-Улаанбаатар-Ховд чиглэлийн MR1022 нислэгээр явахаар захиалга өгсөн зорчигчдынхоо нислэгийг цуцалсан гэсэн?

-“Air expert” компаниас Байгаль орчин, ногоон хөгжлийн яамны ажилтнууд нислэгийн билет авсан юм билээ. Гэтэл уг компани нислэг хийхээс хоёр хоногийн өмнө бидэнд мэдэгдсэн. Бид ачаа ачихдаа зарим суудлуудаа блок хийдэг юм. Яамны ажилтнууд яаралтай ажлаар хөдөө явна гэхээр нь зарим ачаагаа үлдээгээд тэр өдөр нисэх байсан зорчигчид руугаа утсаар яриад яамны хоёр ажилтанг авч ниссэн. Маргааш нь үлдсэн таван зорчигч нь ниссэн. Ингэж зорчигчдын нислэгийг цуцлах болсон нь бидний буруугаас биш “Air expert” компанийн ажилчдын хариуцлагагүй байдлаас болж үүссэн асуудал. Яамны ажилтнууд манай компанитай шууд холбогдон нислэгийн билет захиалах боломжтой байсан.

-Тэгэхээр танай компани гэрээтэй ажилладаг нислэгийн тийз захиалдаг компаниудтайгаа уялдаа холбоо муутай ажилладаг гэсэн үг үү?

-Тэгж шууд утгаар нь ойлгож болохгүй л дээ. Бид бас тийзний үйлчилгээ үзүүлдэг компаниудаа дэмжиж ажиллахыг хичээдэг. Бидний хооронд хийсэн хамтарч ажиллах гэрээний заалтууд байгаа. Хариуцлага алдсан “Air expert” компани манайд албан бичиг ирүүлж буруугаа хүлээж уучлалт хүссэн.