Уржигдар шөнө алдарт дуучин Cheryl Cole болон Will.i.am нар Лос-Анжелес хотноо “McDonalds”-д оройн зоог барихаар яваад 03:30 цагийн үед осолд оржээ. Энэхүү ослын улмаас алдартнууд хөнгөн гэмтэл авсан бөгөөд алдартнууд Will.i.am-ийн 100 мянган фунт стерлингийн үнэтэй Cadillac машинаар явж байсан аж. Гэрчүүдийн ярьснаар машин осолдох үед хамгаалалтын дэр хийлэгдэн Will.i.am-ийн нүүрлүү цохисоноос болж, түүний хамраас цус гарсан бөгөөд тэрбээр машинаасаа яаралтай буужээ. Харин дуучин Cheryl Cole-ийн өмнөх хамгаалалтын дэр ажиллагаагүй тул тэрбээр духаараа өмнөх самбараа мөргөж, хамраас нь цус гарсан байна. Мөн тэрбээр сэгсрэгдсэнээс болж хэсэг хугацаанд толгой нь эргэсэн бөгөөд маш их айж, сандарсан байжээ. Энэхүү хэргийн газар цагдаа дуудсаны дараа дуучин Will.i.am-ийг ойролцоох Седарс-Синай эмнэлэгт хүргэсэн бөгөөд түүнд хүзүүний хамгаалалт зүүлгэсэн байжээ. Алдартнуудын биеийн байдал одоогоор сайн байгаа бөгөөд тэд өөрсдийн Twitter-тээ сайн байгаа гэж бичсэн байна. Дашрамд сонирхуулахад Cheryl Cole удахгүй ирэх аравдугаар сарын гурванд ганцаарчилсан аялан тоглолт хийхээр бэлтгэж байгаа бөгөөд сүүлийн үед тоглолтоо бэлтгээд шаргуу хөдөлмөрлөж байгаа аж.