Хүн төрөлхтний эв нэгдлийн бэлгэ тэмдэг зуны олимпийн XXX наадам Их Британийн нийслэл Лондон хотноо эхлэхэд найм хоног үлдлээ. Лондонгийн олимпод оролцох Өмнөд Солонгосын тамирчдын хувцсыг Facebook хуудсанд хэрэглэгчдийн оруулсан урмын үгсээр чимжээ. Тодруулбал, тамирчдын өмсөх хувцасны дотор талын даавуун дээр facebook хуудсанд тамирчдаа дэмжиж бичсэн урмын үгсийг битүү оруулсан ажээ. Олон мянган амжилт хүссэн сэтгэгдлээс 1000 гаруйг сонгож, доторлосон даавууныхаа хээнд оруулсан байна. Мөн Өмнөд Солонгосын тамирчид анх 1948 оны Лондонгийн XIV зуны наадамд оролцож анхны олимпийн медалиа хүртэж байсан түүхтэй бөгөөд “Honoring the 1948” гэсэн дурсамжийг ч оруулсан байна. Өмнөд Солонгосын тамирчдын хувцсыг Беан Пол хэмээх дизайнер урласан аж.

Дашрамд дуулгахад, солонгосчууд 1976 онд Канадын Монреаль хотноо болсон зуны XXI олимпийн их наадамд чөлөөт бөхийн төрлөөр анхны алтан медалиа авснаас хойш 91 алтан медаль (зуны их наадмаас 68, өвлийн их наадмаас 23) аваад байгаа бөгөөд “Лондон -2012” XXX олимпийн наадмаас 100 дахь алтан медалиа авна гэсэн тооцоотой байгаа аж. Тэдний тооцоолж байгаагаар таэквондогийн төрлөөс энэхүү онцгой 100 дахь алтан медалийг авна гэж үзэж байгаа аж. 

Өмнөд Солонгосын баг тамирчид “Бээжин -2008” XXIX их наадмаас 13 алт, 10 мөнгө, 8 хүрэл нийт 31 медаль хүртсэн амжилтаар наймдугаар байр эзэлж байсан байна. Харин хойд солонгосчуудын хувьд хоёр алт, нэг мөнгө, гурван хүрэл, нийт зургаан медаль хүртсэн амжилтаар 33-р байрт шалгарч байжээ.