УИХ-ын сонгууль өрсөлдөх нам, эвслүүд Үндэсний аудитын газраар мөрийн хөтөлбөрөө хянуулж, баталгаажуулахыг Сонгуулийн тухай хуулийнд заасан байдаг. Үүний дагуу УИХ-ын сонгуульд оролцох намууд энэ сарын 9-өөс өмнө СЕХ-оор мөрийн хөтөлбөрөө баталгаажуулсан байх ёстой. Үндэсний аудитын газарт өчигдрийн байдлаар хоёр эвсэл, 11 нам мөрийн хөтөлбөрөө хянуулахаар өгөөд байв. Үндэсний аудитын газрын Судалгаа, шинжилгээ, бодлогын газрын дарга М.Давааням “Өнгөрсөн баасан гаригаас хойш намууд нэмж мөрийн хөтөлбөрөө хянуулаагүй байна. Нийт 11 нам, хоёр эвсэл мөрийн хөтөлбөрөө хянуулаад бид дүгнэлтээ гаргаад СЕХ-нд хүргүүлсэн. Маргааш буюу энэ сарын 9-ний өдөр мөрийн хөтөлбөр хүлээж авах хугацаа дуусах учраас нэг хоногийн хугацаа байгаа. Намууд мөрийн хөтөлбөрөө нууцалж байгаа учраас аль намын мөрийн хөтөлбөр зөрчилтэй, аль зөрчилгүй гэдгийг хэлэх боломжгүй” гэлээ.

Энэ удаагийн УИХ-ын сонгуульд Эрх чөлөөг хэрэгжүүлэгч нам, Ногоон нам, Эх орон нам, Иргэний хөдөлгөөний нам, МАН, МАХН, Ардчилсан нам, МУНН, МСДН, ИЗНН, Эх орончдын нэгдсэн нам гэсэн 11 нам байгаа бол МАХН-МҮАН, Хамуг Монголын хөдөлмөрийн нам болон Бүгд найрамдах нам хоёр 2012 оны ээлжит сонгуульд эвсч орохоор мөрийн хөтөлбөрөө хянуулж, дүгнэлтээ гаргуулсан байна. Нам, эвслээс дүгнэлт гаргуулсан мөрийн хөтөлбөрөө СЕХ-нд хүргүүлж, СЕХ-ны хуралдаанаар хянаж баталгаажуулах учиртай.

Энэ удаагийн сонгуульд нэр дэв­шиг­чид, нам, эвсэл мөрийн хөтөлбөр батлах тухай хуульд бэлэн мөнгө, эд хөрөнгөтэй холбогдсон эрх олгох, уул уурхай, газрын тос, эрдэс баялгийн болон бусад салбарын орлогоос иргэдэд аливаа хишиг, хувь, тэдгээртэй адилтгах бусад зүйл хүртээх, эсхүл зээлийн болон бусад өр төлбөрийг хүчингүйд тооцох, хөрвүүлэх, түүнчлэн үнэ төлбөргүй, эсхүл хямдралтай үнээр үйлчилгээ үзүүлэх, эсхүл ажлын байранд зуучлах, ажилд оруулах зэрэг амлалт авахаар тусгахыг хориглоно гэж заасан байдаг. Сонгуулийн ерөнхий хороо энэ заал­тын дагуу нам, эвслүүдийн мөрийн хөтөл­бөрийг хянаж, бүртгэх эсэхээ шийдвэрлэдэг.

Хэдийгээр намууд мөрийн хөтөл­бөрөө олон нийтэд ил болгоогүй ч зарим намын мөрийн хөтөлбөрт цалин нэмэх, эх орны хувь хишиг тарааж байгаа үйл ажиллагааг үргэлжлүүлэх зэргийг тусгасан байсан. Хэрэв намууд мөрийн хөтөлбөртөө хуулиар хориглосон зүйлсийг тусгасан тохиолдолд ямар арга хэмжээ авдаг талаар СЕХ-ны нарийн бичгийн дарга Ч.Содномцэрэнгээс тодруулахад “Тухайн нам, эвсэл мөрийн хөтөлбөрөө аудитын газарт хянуулж, дүгнэлт гаргасныг СЕХ-ны хуралдаанаар авч хэлэлцэнэ. Үндэсний аудитын газраас тухайн намын мөрийн хөтөлбөр зөрчилтэй эсэхийг дүгнэдэг. Хэрэв мөрийн хөтөлбөр нь зөрчилтэй тохиолдолд тухайн нам, эвсэл, бие даан нэр дэвшигчдэд хуулийн хугацаанд мөрийн хөтөлбөрийн зөрчилтэй хэсгийг засах гурав хоногийн хугацаа өгдөг. Тухайн хоногт зөрчилтэй мөрийн хөтөлбөрөө засах юм бол дахин СЕХ-ны хурлаар хэлэлцэж бүртгэдэг” гэлээ.

УИХ-ын сонгуульд нэр дэвших намууд мөрийн хөтөлбөрөө баталгаажуулснаар маргааш хэдэн нам УИХ-ын 2012 оны сонгууль оролцох нь тодорхой болох юм.  Өчигдрийн байдлаар таван нам,  бүртгүүлэхээр баримт бичгээ СЕХ-нд хүргүүлсэн байна. Мөн эх сурвалжийн мэдээлснээр  зургаан намын мөрийн хөтөлбөр зөрчилтэй байсан байна. Ардчилсан нам өнөөдөр 11.40 цагт СЕХ-нд мөрийн хөтөлбөрөө баталгаажуулж сонгуульд оролцох эрхээ авах юм байна. Сонгуульд оролцох нам, эвслийг бүртгэхийн тулд хуульд заасан бичиг баримтыг бүрдүүлж, Аудитын газрын дүгнэлтийг үндэслэн тав хоногийн дотор тухайн намыг бүртгэж батламж олгодог юм байна. Бусад намын хувьд хэзээ батламжаа авах нь тодорхойгүй байгаа гэж СЕХ-ныхон мэдээлж байлаа.