Монголын уул уурхайн салбар, түүн дунд нүүрсний салбарын өнөөгийн байдал, цаашдын хандлага, хөгжих арга замыг тодорхойлох зорилготой “Coal Mongolia” чуулга уулзалтын хүрээнд шилдэг сэтгүүлч шалгаруулах гэж байна. Уул уурхайн нэгдсэн сан “Mining.mn” сайтын нэрэмжит энэхүү уралдаан нь Монголын нүүрсний салбарт сэтгүүл зүй өөрийн мэдээллийн харилцаагаа идэвхжүүлэхэд онц ач холбогдол өгч байгаа ажээ. Өөрөөр хэлбэл, туглгамдсан асуудлыг сөргүүлэн тавьж, түүнийг шийдэх арга замыг хайхад уриалах, гадаадын хөрөнгө оруулагчдыг татах хийгээд олон түмэнд нүүрсний салбарыг  тод томруун, хүртээмжтэй мэдээлэхэд чиглүүлэх зорилготой аж. 

Уралдаанд дээрх чиглэлээр бичдэг сонин, сайтын сэтгүүлчид хоёр болон түүнээс дээш бүтээлээр оролцох боломжтой юм. Уралдааны шилдэг сэтгүүлчээр зөвхөн нэг хүнийг шалгаруулж, гурван сая төгрөгийн шагнал олгох бөгөөд бүтээлийг хоёрдугаар сарын 1-ний дотор МҮЭСТО-ны 200 тоотод хүлээн авах юм байна. Ингэхдээ хэвлэгдэн гарсан эх хувилбараар болон файлаар авчрахын хамт холбогдох нэр, хаягаа тодорхой бичсэн байх ажээ.