Монгол Улсын Гадаад харилцааны сайд Г.Занданшатар БНХАУ-ын Гадаад хэргийн сайд Ян Жэчигийн урилгаар БНХАУ-д 2012 оны нэгдүгээр сарын 11-15-ны хооронд албан ёсны айлчлал хийхээр өнөөдөр Бээжинд хүрэлцэн ирэв. Тэрбээр өнөөдөр БНХАУ-ын Худалдааны яамны сайд Чэнь Дэминтэй уулзаж, хоёр улсын худалдаа, эдийн засгийн хамтын ажиллагааны талаар санал солилцлоо. Хоёр талын харилцаа стратегийн түншлэлийн төвшинд гарч, өнөөдөр хоёр талын харилцаа, хамтын ажиллагаа улс хоорондын харилцааны хамгийн өндөр түвшинд хүрээд байгаа билээ. Худалдаа, эдийн засгийн хамтын ажиллагаа стратегийн түншлэлийн гол тулгуур болоод байна. Хоёр улсын худалдааны нийт хэмжээ өнгөрсөн онд хоёр дахин өсөж, 6.3 тэрбум ам.долларт хүрээд байгаа нь үүний нотолгоо юм. Мөн 2011 оны зургадугаар сард болсон Монгол-Хятадын ЗГХК-ын ээлжит хуралдаан амжилттай хуралдсаныг дурдаад, түүний шийдвэрийн хэрэгжилтийг сайн хангах үүднээс Комиссын ээлжит хуралдааны хооронд ажлын хэсгийн уулзалтыг тогтмол хийх нь зүйтэй гэж үзэж буйгаа хоёр тал илэрхийлэв. 

Сайд Г.Занданшатар уулзалтын үеэр Монгол Улс автобензин, дизелийн түлш, бусад шатах тослох материалиар дутагдах, хомсдолд орох нөхцөлд Хятадын Засгийн газраас бүх талын дэмжлэг туслалцаа яаралтай үзүүлэхийг санал болгов. Түүнчлэн газрын тос, эрчим хүчний салбарын харилцааг өргөтгөх, Монголд газрын  тос боловсруулах үйлдвэр барихад дэмжлэг үзүүлэх, Оюутолгойн цахилгаан эрчим хүчийг Өвөрмонголоос авах, Баяннуур аймгийн удирдлагаас Монголоос орж ирж буй нүүрсний татварыг өндөр тогтоосныг харж үзэх, ОХУ, БНХАУ-ыг холбосон хийн хоолойг Монгол улсаар дамжуулах зэрэг олон чухал асуудлыг хүсэлт болголоо. БНХАУ-ын Худалдааны яамны сайд Чэнь Дэмин уг асуудлуудыг нааштайгаар шийдэхэд өөрийн болон яамны зүгээс бүх боломжоо дайчлан ажиллана гэдгээ илэрхийллээ.  Уулзалтын төгсгөлд Гадаад харилцааны сайд Г.Занданшатар, БНХАУ-ын Худалдааны яамны сайд Чэнь Дэминийг тааламжтай цагтаа Монгол Улсад айлчлахыг урилаа. Гадаад харилцааны сайд Г.Занданшатар мөн өдөр Бээжин дэх ЭСЯ-нд очиж монгол оюутан залуус, ЭСЯ-ны төлөөлөлтэй уулзлаа гэж ГХЯ-ны Олон нийттэй харилцах газраас мэдээлэв.