Хуучин ЗХУ-д шийтгэгдэж хэлмэгдсэн монгол иргэдтэй холбоотой хэрэг материалыг  ОХУ-ын Холбооны Аюулгүй байдлын албаны архивуудаас үндсэндээ хуулбарлан авч  дууслаа. Одоо Монгол Улсын иргэдтэй холбоотой хэрэг материалыг ОХУ-ын Дотоод явдлын Яамны архиваас эрэн сурвалжлах, хуулбарлан авах, хэргүүдийг нь цагаатгуулах саналыг холбогдох байгууллагад нь тавих саналтай байна.

Энэ тухай өнөөдөр болсон Цагаатгах ажлыг удирдан зохион байгуулах улсын комиссын хуралдааны үеэр Тагнуулын Ерөнхий газрын Тусгай архивын орлогч дарга Ш.Цогбаатар мэдэгдлээ. Тэрээр ажлын хэсгийг ахлаж ОХУ-ын Холбооны Аюулгүй байдлын албаны Тусгай архив, Батлан хамгаалах яамны Цэргийн төв архивт  ажилласан тухайгаа хуралдааны үеэр танилцуулсан юм.

Тэд томилолтын хугацаанд 10 мянга гаруй хуудас хэрэг материалтай уншиж танилцасны зэрэгцээ мянга шахам хуудас материал, 22 зураг хуулбарлан авчирсан байна. Тэдгээрийн дотор БНМАУ-ын Хууль зүйн яамны сайд Гомпилын Даншийцоодол, ДЯЯ-ны Онцгой хэлтсийн тасгийн дарга Эрдэнийн Дорж, лам Батын Лувсан, малчин Санжийн Цэдэн зэрэг 12 хүний хэрэг материалыг хуулбарлан авчирчээ.

Энэхүү хэлмэгдсэн монгол иргэдтэй холбоотой хэрэг материалыг хуулбарлан авчирсан нь хэлмэгдүүлэлтийн асуудлыг судлах, түүний хор уршиг, мөн чанарыг ойлгоход ач холбогдолтой юм гэдгийг хуралдаанд оролцогсод тэмдэглээд цаашид ОХУ-ын хууль хяналтын байгууллага болон орон нутгийн архивуудад монгол иргэдтэй холбоотой хэрэг материал хадгалагдаж байж болох тул тэдгээрт хандаж ажиллах нь чухал байна гэлээ. Мөн хуралдаанаас зөвлөлтийн 17 дугаар армийн шугамаар тусгай үүрэг гүйцэтгэж яваад сураггүй алга болсон, шийтгэгдсэн гэх монгол иргэдийн нэрсийн жагсаалтыг энэ оны 3-р улиралд багтаан нягтлан гаргах улмаар хэлмэгдсэн нь тогтоогдвол цагаатгуулах талаар ОХУ-ын  холбогдох байгууллагад хандах нь зүйтэй гэж үзлээ Энэ тухай  Цагаатгах ажлыг удирдан зохион байгуулах улсын комиссын Хэвлэл, мэдээллийн албанаас мэдээлэв.